Lautein husu proposta PPG iha saláriu no vensimentu hamutuk rihun $60-resin
DILI, 27 Agostu 2026 (TATOLI)-Iha Reuniaun Komité Revizaun Polítika Orsamentu Jerál Estadu (OJE) 2027, Autoridade Munisípiu Lautein hatama proposta iha Planu Prioridade Governu (PPG) kona-ba saláriu no vensimentu hamutuk rihun $60-resin hodi reforsa funsionáriu administrasaun iha Lautein.
Prezidente Autoridade Munisípiu Lautein, Melio de Jesus, informa sira simu tetu husi Ministeriu Finansa (MF) hamutuk millaun $8,4, ne’ebé fahe ba saláriu no vensimentu, transferénsia públika no kapitál dezenvolvimentu.
“Ita la hetan narrativa ba kapitál menór ninian, tanbá ne’e mak ami mai hato’o ami-nia proposta liuhusi Planu Prioridade Governu (PPG) ligadu ba saláriu no vensimentu, tanba ami iha lakuna ba saláriu no vensimentu nian. Ami hato’o proposta hamutuk rihun $60-resin atu kobre forsa traballu ne’ebé eziste iha Lautein”, Melio de Jesus hatete ba Tatoli, ohin.
Nia subliña katak bainhira proposta la aprova mak tinan oin afeta ba funsionáriu 25 ne’ebé serbisu iha administrasaun munisípiu nian, liuliu ba tékniku estensionista sira, tékniku Planu Dezenvolvimentu Munisipál (PDM) no Pograma Nasionál Dezenvolvimentu Suku (PNDS).
Totál funsionáriu Munisípiu Lautein daudaun hamutuk 244.
Ketiona kona-ba ezekusaun OJE 2026, nia dehan to’o agora atinje 68%, bainhira konta mós obrigasaun atinje 78% husi totál alokasaun millaun $8,6.
“Liga ho podér lokál, daudaun ita prepara kondisaun mínima infraestrutura nian, liuliu kondisaun sira ne’ebé ita bele prepara atu hakat ba podér lokál, hanesan estrada, ponte, saúde, kapasitasaun rekursu umanu, eletrisidade. Ami konvida Lautein oan sira fila ona mai hamutuk dezenvolve ita-nia rai. Povu hein hela ita”, nia hato’o.
Jornalista: Arminda Fonseca
Editora: Maria Auxiliadora
