Governu aprova rezolusaun akordu ba izensaun vistu ne’ebé selebra ho Vietname-Vanuatu
DILI, 02 Setembru 2026 (TATOLI)—Governu liuhusi Konsellu Ministru aprova projetu proposta rezolusaun rua husi Parlamentu Nasionál, ne’ebé aprezenta husi Vise-Ministra Negósiu Estranjeirus no Kooperasaun, Jesuína Maria Ferreira Gomes, kona-ba aprovasaun akordu ba izensaun vistu ne’ebé selebra ho Vietname no Vanuatu.
Vise-Ministra Negósiu Estranjeirus no Kooperasaun, Jesuína Maria Ferreira Gomes, hateten ohin ne’e sira aprezenta de’it proposta rezolusaun atu Governu haruka ba Parlamentu Nasionál hodi ratifika akordu rua ne’ebé Governu Timor-Leste asina ona ho Repúblika Sosialista Vietname no Repúblika Vanuatu.
“Tanba tuir lei artigu KRDTl 125, katak bainhira Governu Timor-Leste asina ona akordu tratadu internasionál ida tenke lori mai Konsellu Ministru hodi halo rezolusaun ida no haruka akordu ne’e ba PN hodi halo ratifikasaun,” Vise-Ministra MNEK ne’e informa ba jornalista sira iha Palásiu Governu, ohin.
Aprezentasaun ne’e, nia dehan, kona-ba akordu rua ne’e de’it no ohin hetan aprovasaun ona husi Konsellu Ministru.
Enkuantu kona-ba akordu dahuluk, ne’e asina iha Hanoi iha loron 09 Juñu 2026, estabelese izensaun vistu ba titulár pasaporte komún Timor-Leste no Vietname nian, hodi nune’e bele fasilita entrada, tránzitu no estadia husi sidadaun sira husi nasaun rua ne’e ba objetivu turístiku nomós kontribui ba hametin relasaun bilaterál.
Akordu daruak, asina iha Port Vila iha loron 22 fulan-Jullu tinan 2026, estabelese izensaun vistu mútuo ba titulár pasaporte diplomátiku, ofisiál ka servisu Timor-Leste no Vanuatu nian, ho objetivu atu fasilita viajen ofisiál entre nasaun rua ne’e no mós hametin kooperasaun bilaterál.
Jornalista : Alexandra da Costa
Editór : Cancio Ximenes
