CAEXPO 2026 sei lori parseria estratéjika Xina-ASEAN ba nivel aas liu

NANNING, 18 Setembru 2026 (TATOLI)–Vise-Primeiru-Ministru Konsellu Estadu Repúblika Populár Xina, Ding Xuexiang, hateten Expo China-ASEAN (CAEXPO) ba da-23 tinan ne’e sei aselera implementasaun protokolu atualizasaun Área Komérsiu Livre China-ASEAN (CAFTA 3.0) hafoin nia asinatura ofisiál no sei lori parseria estratéjiku Xina no ASEAN ba nivel aas liu.

Notísia Relevante: “Expo Xina-ASEAN atu hametin relasaun ekonomia iha área investimentu-komérsiu”

“Ida-ne’e sei lori duni parseria estratéjiku Xina nian ba altura foun ida. Ami sei implementa ho laran tomak rekizitu sira ne’ebé estabelese ona no observasaun sira husi líder sira ASEAN nian,” Vise-PM, Ding Xuexiang hateten iha nia diskursu bainhira halo abertura ba Expo referidu, kuarta ne’e.

Tuir nia, tinan ne’e CAEXPO inkorpora tomak implementasaun inisiativa bloku haat no inisiativa importante husi Komérsiu, akordu transfronteirisu no uma komún ba seguransa nasionál Xina nian.

Espozisaun ne’e ho tema “CAFTA 3.0 – Oportunidade Foun ba Moris Di’ak Liu”, no CAEXPO hadi’a ona ekonomia dijitál no kria ona área espozisaun foun ba ekonomia verde no karbono kiik.

Nia esplika tan, Intelijénsia Artifisiál (AI) sai hanesan sentru no destake boot iha expo tinan ne’e.

“Ami aumenta ona komponente AI nian, atualiza kompletamente sesaun AI nian, no halibur teknolojia AI avansada no aplikasaun reál sira. Ba dala uluk ami kria ona AI Megastore no sei hala’o enkontru meza redonda Ministru sira AI nian hodi diskute kooperasaun étika no seguransa AI nian, hodi dudu kooperasaun AI Xina-ASEAN ba etapa foun ida,” nia dehan.

Sekretáriu Partidu Komunista Xina ba Rejiaun Autónomu Guangxi Zhuang, Chen Gang, ne’ebé sai nu’udar uma-na’in informa ba dala uluk harii ona área espozisaun ba Espasu Futuru no Kbiit Kreximentu Empreza Inovasaun Teknolójiku no ba dala uluk harii ona área espozisaun ne’ebé dedika ba nesesidade sira husi nasaun ASEAN

Nia dehan, sei introdús modelu prezervasaun iha ne’ebé líder kadeia industriál lori parseiru industriál sira no área espozisaun finanseira hatudu sistematikamente dezenvolvimentu AM+ Finansa no Fintech global.

Tuir dadus ofisiál, tinan ne’e empreza liu 3.400 husi nasaun 73 mak halo espozisaun no sei hala’o eventu ekonómiku no komersiál liu 50.

Tuir Ministériu Komérsiu Xina, iha tinan lima ikus nia laran, dezde estabelesimentu Parseria Estratéjiku Abranjente Xina-ASEAN, komérsiu bilaterál sai reziliente. Iha 2025, komérsiu atinje rekorde foun ho montante trillaun $1.5 iha ne’ebé Xina sai parseiru komersiál boot liu ASEAN nian durante tinan 17 tutuir malu.

Tuir planu, Timor-Leste nu’udar membru foun ASEAN partisipa iha expo ne’e hodi promove produtu lokál no buka oportunidade investimentu foun.

Notísia Relevante: CAEXPO ba da-23 marka momentu foun ho AI no Trade Matching, Timor-Leste halo estreia

Jornalista : Hortêncio Sanchez

Editór        : Cancio Ximenes