Guangxi kompromete apoiu TL iha setór ekonomia
NANNING, 19 Setembru 2026 (TATOLI)—Rejiaun Autonoma Guangxi, Xina, hatudu kompromisu forte atu kontinua apoiu Timor-Leste iha setór ekonomia liuhusi kooperasaun Governu ho Governu, kooperasaun setór privadu no investimentu.
Kompromisu ne’e hato’o bainhira Ministru Komérsiu no Indústria (MCI), Nino Pereira, hasoru malu ho Sekretáriu Partidu Komunista Xina iha Rejiaun Guangxi, iha Nanning, Sesta ne’e.
Enkontru bilaterál ne’e hala’o iha marjen partisipasaun Timor-Leste nian iha 23rd China-ASEAN Expo (CAEXPO) ne’ebé hala’o husi loron 17 to’o 21 Setembru iha Nanning.
Ministru Komérsiu no Indústria, Nino Pereira, hateten governante sira iha rejiaun ne’e kompromete atu tulun nafatin Timor-Leste, no partisipasaun iha CAEXPO ne’e sai hanesan oportunidade boot tebes atu hametin kooperasaun ekonomia ne’ebé fó benefísiu ba Timor-Leste.
“Governante sira iha rejiaun ida-ne’e kompromete atu tulun nafatin Timor-Leste, iha jornada bainhira partisipa CAEXPO ne’e oportunidade boot tebes, nune’e mak ita sei halo kooperasaun iha área ne’ebé fó benefísiu ekonomia ba Timor-Leste,” Nino Pereira hateten ba TATOLI iha Nanning.
Nia hatutan, área kooperasaun ne’ebé diskute klean liu mak iha setór indústria ba prosesamentu agríkola, indústria manufatureira, indústria renovavel, materiál konstrusaun no setór turizmu.
“Ita haree atu halo kooperasaun mak iha área indústria ba prosesamentu agríkola, indústria manufatureira nian no mós ba iha indústria renovavel, ba materiál konstrusaun no setór turizmu,” nia dehan.
Iha sorin seluk, Ministru mós hato’o apresiasaun ba Governu Guangxi nian ne’ebé organiza ho susesu eventu espozisaun boot tebes entre Xina no nasaun membru ASEAN sira, inklui Timor-Leste ne’ebé foin tama nudar membru kompletu.
“Iha hasoru malu ho lider Partidu Komunista iha Rejiaun Autonoma Guangxi nian, ita hasoru nia atu fó apresiasaun ba servisu hotu ne’ebé mak sira halo hodi bele organiza eventu espozisaun ne’ebé mak boot tebes entre Xina no nasaun membru ASEAN sira,” nia dehan.
Tuir Nino Pereira, CAEXPO la’ós de’it espozisaun ba produtu maibé hanesan plataforma estratéjiku ida atu promove relasaun bilaterál, loke dalan ba setór privadu sira atu halo negosiu no atrai investimentu.
“Expo ne’e hanesan plataforma importante ida hodi promove kooperasaun bilaterál, Governu ho Governu, promove kooperasaun negósiu entre ita-nia setór privadu sira, buka oinsá mak dudu dezenvolvimentu ba investimentu no komérsiu no loke oportunidade atu atrai mós nasaun membru ASEAN sira atu haree oinsá Xina hanesan poténsia ba merkadu ne’ebé mak boot tebes, espesialmente Guangxi ne’ebé ho populasaun liu millaun 50, ida-ne’e merkadu ida di’ak tebes ba ita,” nia dehan.
Guangxi nu’udar provínsia ne’ebé besik liu ho ASEAN no sai hanesan portal prinsipal Xina nian ba kooperasaun ho Sudeste Aziátiku. Ho populasaun millaun 50 resin, Guangxi iha potensiál boot nudar merkadu ba produtu Timor-Leste nian hanesan kafé, produtu agrikultura seluk no produtu manufatura ki’ik.
Partisipasaun Timor-Leste iha CAEXPO tinan ne’e ho delegasaun hamutuk empreza 10 resin ne’ebé hatudu produtu lokál no buka oportunidade atu halo parseria ho kompañia husi Xina no ASEAN.
Jornalista : Hortêncio Sanchez
Editór : Cancio Ximenes
