Insédiu Merkadu Taibesi, APC identifika kauza husi sirkuítu eletrisidade
DILI, 27 Setembru 2026 (TATOLI)–Autoridade Protesaun Sivil (APC, sigla portugés) liuhusi Bombeiru identifika kauza akontesimentu insédiu iha Merkadu Taibesi iha Sábadu (26/09) ne’ebé estraga maizumenus uma hamutuk kuaze 20, motorizade neen, inklui sasán importante balun tanba sirkuítu eletrisidade.
Komandante Unidade Espesiál Protesaun Sivil, Fernando da Costa, bainhira rekolla informasaun, identifika katak sirkuítu mai husi abitante ida-ne’ebé tein etu no modo uza materiál elétrika.
“Bainhira akontesimentu ne’e, komunidade kontaktu kedas APC, nune’e APC ne’ebé besik iha Merkadu Taibesi diretamente halo atuasaun, maibé labele salva buat barak tanba ahi nia movimentu lais tebes, ho intensidade anin mós boot uitoan, inklui komunidade nia uma rabat malu no konstrui uza ekipamentu ne’ebé fásil ba ahi atu han lalais (materiál hanesan piku, no triplex),” Komandante esplika Ajénsia TATOLI via telefónika, Domingu ne’e.
Notísia relevante : SEF koloka pesoál na’in-rua iha pontu entrada Santuáriu atu prevene inséndiu
Nia haktuir, hafoin ekipa Bombeiru to’o fatin akontesimentu, ahi lakan boot ona, ne’ebé ekipa la konsege salva komunidade nia sasán. Iha komunidade balun lakon dokumentu importante no osan.
“Komunidade balun nia osan mós ahi han hotu, maibé seidauk hatene nia montante tanba sei iha prosesu rekolla dadus. Sasán barak mak ita la konsege salva. Komunidade la vítima ba inséndiu (mortalidade), maibé iha balun mak sofre kanek tanba kalen ko’a bainhira sira halai sai husi uma,” nia tenik.
Ekipa daudaun kontinua halo atuasaun hodi rekolla ekipamentu sira no dadus, maibé sira sei fó apoiu umanitária emerjénsia, enkuantu atu konstrui fali komunidade afetadu sira-nia uma ka apoiu ekipamentu ne’e seidauk bele, tanba ne’e iha kompeténsia Ministériu Administrasaun Estatál (MAE) ka Autoridade Munisípál.
“Ami sei labele konstrui fali uma hanesan, komunidade balun ne’ebé hetan dezastre, tanba afetadu sira-ne’e hela iha área merkadu nia laran, lei fó dalan bainhira sira konstrui uma iha fatin privada ka la’ós iha espasu públiku, karik sira hela iha fali merkadu nia li’ur ne’e ita bele ajuda konstrui uma,” nia esplika.
Fernando da Costa dehan, kestaun evakuasaun ba afetadu sira sai problema ba ekipa iha terrenu.
“Orisehik ami mós halo atuasaun ba insédiu ida-ne’ebé akontese besik HNGV, ne’e mós tanba sirkuítu hotu, bainhira afetadu tein hela maka rona tarutu husi fiu tein, ne’ebé ahi han sira-nia kuartu haat no dapur, maski laiha vítima, maibé ita sei apoiu konstrui fali fatin ne’ebé ahi-han, la signifika ita atu konstrui fali uma tomak maibé bazeia ba área ida-ne’ebé ahi-han de’it, tanba ne’e hela iha uma privada,” Komandante haktuir.
Inséndiu iha Bidau besik Ospitál Nasionál ne’e la fó impaktu ba fasilidade sira Ospitál tanba ekipa Bombeiru halo atuasaun ho intensivu no lalais, nune’e la habelar tan ba fatin seluk.
Jornalista : Alexandra da Costa
Editora : Julia Chatarina
