Ró Militár Jako sei hala’o patrullamentu iha tasi parte norte
DILI, 10 Outubru 2026 (TATOLI)—Ró Militár Jako, ne’ebé Forsa Defeza Timor-Leste (F-FDTL) uza ba operasaun marítima, sei hala’o hikas patrullamentu iha tasi parte norte (tasi feto), hafoin ekipa téknika husi Xina konklui manutensaun no instalasaun motór ró nian.
Komandante Komponente Navál, Komodoro Higinio das Neves, hateten katak ekipa téknika sira konklui ona manutensaun ró militár ne’e, inklui instalasaun motór prinsipál no ekipamentu sira iha ró leten, no atualizasaun sistema antigu bá sistema foun.
Nia hato’o informasaun ne’e ba jornalista sira, hafoin partisipa iha serimónia komemorativa aniversáriu daruak Forsa Apoiu Jerál, ne’ebé hala’o iha Sentru Instrusaun Komandante Nicolau Lobato, Metinaru, Sábadu ne’e.
“Foin lalais ne’e, ita hatuun ona ró ne’e ba tasi, maibé nia motór seidauk instaladu. Iha semana kotuk, tékniku sira instala ona motór prinsipál no ekipamentu sira iha ró leten, no atualiza sistema antigu bá sistema foun. Ho prosesu hirak-ne’e, ró bele hala’o operasaun iha tasi,” Komodoro Higinio das Neves esplika.
Nia hatutan katak, tuir planu, Ró Militár Jako sei hahú hala’o operasaun iha tasi iha fulan ida nia laran, tanba servisu manutensaun no preparasaun téknika sira ramata ona.
Komodoro Higinio mós esplika katak ró militár ne’e sei hala’o de’it operasaun iha tasi parte norte, maibé laiha kapasidade atu hala’o operasaun iha tasi parte súl.
Kontekstu
Ró Militár Jako, ne’ebé hanaran ofisiál NRDTL Jako no tama iha klase Shanghai II 62, integra iha Komponente Navál FALINTIL-Forsa Defeza Timor-Leste (F-FDTL). Ró ne’e iha papél atu apoia defeza soberania nasionál, monitoriza área marítima no ajuda kontrola atividade ilegál iha tasi Timor-Leste.
Manutensaun ba ró ne’e sai asuntu ne’ebé F-FDTL no Ministériu Defeza akompaña durante tinan hirak nia laran. Iha notísia ne’ebé TATOLI publika iha 23 Jullu 2024, Ministru Defeza, Kontra-Almirante Donaciano Costa Gomes, informa katak prosesu manutensaun ba Ró Militár Jako seidauk ramata, tanba empreza ne’ebé hala’o servisu ne’e hasoru limitasaun téknika no husu osan tan atu kompleta servisu. Iha tempu ne’ebá, ró Jako no ró Betano mós tama iha planu manutensaun. Lee notísia TATOLI, 23 Jullu 2024.
Iha 7 Agostu 2026, Governu no Komandu F-FDTL hala’o serimónia lansamentu Ró Militár Jako iha Doka Behau, Postu Administrativu Lakló, Munisípiu Manatutu, hafoin prosesu manutensaun no reabilitasaun. Maibé, ró ne’e seidauk bele hahú operasaun tanba presiza atualiza sistema tékniku, inklui sistema jeradór, molok bele navega ho seguru. Lee notísia TATOLI, 24 Agostu 2026.
Iha notísia ofisiál F-FDTL ne’ebé publika iha 7 Agostu 2026, Xefe Estadu-Maiór-Jenerál F-FDTL, Tenente-Jenerál Domingos Raul “Falur Rate Laek”, subliña katak prezensa ró patrulla iha tasi importante atu asegura soberania, monitoriza área marítima no proteje interese nasionál. Nia mós destaka nesesidade atu haforsa kapasidade marítima hodi hasoru ameasa hanesan peska ilegál no tráfiku ilísitu. Lee notísia ofisiál F-FDTL.
Jornalista: Natalino Costa
Editór: Xisto Freitas da Piedade
