SEKOMS sei submete revizaun lei komunikasaun sosiál ba KM iha Novembru
DILI, 12 Outubru 2026 (TATOLI)—Sekretáriu Estadu Komunikasaun Sosiál, Expedito Dias Ximenes, informa SEKOMS sei submete revizaun ba lei komunikasaun sosiál nú.5/2014 ba Konsellu Ministru iha fulan-Novembru) 2026.
Notísia Relevante: Revizaun Lei Komunikasaun Sosiál hein diskusaun ikus hodi submete ba KM
“Lei komunikasaun sosiál nia prosesu la’o hela no iha fulan oin, ami sei submete ba Konsellu Ministru atu apresia,” Sekretáriu Estadu Komunikasaun Sosiál, Expedito Dias Ximenes, informa ba jornalista sira iha iha Tower, Fatuhada, ohin.
Revizaun ba lei komunikasaun sosiál ne’e, bele lori fali ba iha Parlamentu Nasionál hodi halo audiénsia públiku ne’ebé sira iha kompeténsia tomak atu aumenta ka altera lei balun iha ezbosu ida-ne’e.
“Karik PN aprova ona mak prosesu tuir mai sei lori ba iha Prezidente Repúblika hodi promulga, ne’ebé prosesu la’o hela,” nia dehan.
Nia dehan, kona-ba sensibilizaun ne’e SEKOMS halo hotu ona ho asosiasaun jornalista sira no mídia-na’in sira, no daudaun ne’e sira hato’o hela sira-nia hanoin ba ekipa tékniku SEKOMS nian.
“Ne’ebé, ita hein katak fulan oin bele lori ona ba Konsellu Ministru no to’o iha Parlamentu Nasionál mak deside iha audiénsia públika,” nia hateten.
Notísia Relevante: Revizaun ba Lei KOMSOS labele fó ameasa ba liberdade imprensa
Jornalista : Alexandra da Costa
Editór : Cancio Ximenes
