Top

STAE Manatutu atualiza ona kartaun biométriku ba eleitór na’in-22.125

Inan-feton ida hatudu hela kartaun biométriku. Imajen TATOLI/António Daciparu

DILI, 20 Novembru 2026 (TATOLI)—Sekretariadu Tékniku Administrasaun Eleitorál (STAE) Munisípiu Manatutu atualiza ona kartaun eleitorál biométriku ba eleitór na’in-22.125, hosi totál eleitór 40.456 ne’ebé rejistadu iha munisípiu ne’e, to’o 19 Novembru 2026.

Diretór STAE Munisípiu Manatutu, Mariano Natalino da Silva, informa katak prosesu atualizasaun kontinua hala’o hela atu asegura eleitór sira-ne’ebé seidauk atualiza sira-nia kartaun biométriku bele hetan atendimentu.

“Ida-ne’e mak dadus STAE Manatutu atualiza ona to’o loron 19 Novembru 2026. Ami kontinua fó atendimentu ba eleitór sira-ne’ebé seidauk atualiza sira-nia kartaun biométriku,” Diretór STAE Manatutu ne’e dehan ba TATOLI liuhusi aplikasaun WhatsApp, Sesta ne’e.

Nia esplika katak hosi dadus eleitór ne’ebé rejistadu, eleitór foun hamutuk 2.620, enkuantu eleitór antigu hamutuk 37.902. Hosi totál ne’e, eleitór na’in-22.125 ka 58,37% atualiza ona sira-nia kartaun ba sistema biométriku, enkuantu eleitór na’in-15.777 ka 41,63% seidauk halo atualizasaun.

Nia mós informa katak atividade Resensiamentu Eleitorál no Atualizasaun Baze Dadus (RE-ABD) ne’e hala’o iha postu administrativu neen iha Munisípiu Manatutu, hahú hosi 09 Novembru 2026.

“Ami hahú ona halo atendimentu móvel iha suku sira atu intensifika liután atendimentu tuir kalendáriu ne’ebé ami prepara. Ami mós halo koordenasaun ho autoridade munisipál, Komisaun Nasionál Eleisaun (CNE-sigla portugeza), Polísia Nasionál Timor-Leste (PNTL), lideransa komunitária no entidade relevante sira seluk,” nia esplika.

Aleinde atualizasaun dadus biométriku, Mariano Natalino da Silva mós hateten katak ekipa STAE halo identifikasaun ba eleitór ne’ebé rejista dala rua iha baze dadus eleitorál.

“Ami mós deteta eleitór balun ne’ebé rejista dala rua. Bainhira hetan kazu hanesan ne’e, ami halo eliminasaun kedas rejistu ba eleitór ida atu evita duplikasaun iha baze dadus eleitorál,” nia dehan.

Nia hatutan katak atividade RE-ABD ne’e nu’udár parte hosi preparasaun ba eleisaun prezidensiál 2027, inklui preparasaun planu operasionál ba sentru votasaun no estasaun votasaun.

Tuir nia informasaun, iha Munisípiu Manatutu prepara ona sentru votasaun hamutuk 85 no estasaun votasaun 103.

Kontestu

Governu Timor-Leste, liuhusi Sekretariadu Tékniku Administrasaun Eleitorál (STAE), hahú implementa prosesu Resensiamentu Eleitorál no Atualizasaun Baze Dadus Eleitorál Biométriku iha 07 Outubru 2026 no sei kontinua to’o 22 Janeiru 2027.

Prosesu ne’e hala’o iha postu administrativu hotu-hotu no Autoridade Administrativa Ataúru, nu’udár parte hosi preparasaun ba eleisaun prezidensiál 2027. Atividade ne’e iha objetivu atu atualiza dadus eleitór sira ba sistema biométriku, inklui rejista eleitór foun, hadi’a informasaun pesoál no atualiza kartaun eleitorál, atu asegura prosesu eleitorál ne’ebé organizadu no dadus eleitór ne’ebé loos.

Klik notísia relevante sira iha kraik hodi lee:

  1. Avizu kona-ba Resensiamentu Eleitorál no Atualizasaun Baze Dadus Eleitorál Biométriku. Notísia ne’e esplika katak STAE hala’o atendimentu resensiamentu eleitorál no atualizasaun kartaun biométriku hosi 07 Outubru 2026 to’o 22 Janeiru 2027 iha postu administrativu hotu-hotu no Ataúru.
  2. CNE no STAE atualiza Ramos-Horta kona-ba preparasaun ba eleisaun prezidensiál 2027. Notísia ne’e relata kona-ba preparasaun CNE no STAE, inklui resensiamentu eleitorál no atualizasaun dadus biométriku ba eleitór sira.
  3. Resensiamentu eleitorál ba timoroan iha rai-li’ur hahú iha Outubru. Notísia ne’e esplika prosesu resensiamentu no atualizasaun dadus eleitorál ba sidadaun Timor-Leste ne’ebé hela iha rai-li’ur nu’udár parte hosi preparasaun ba eleisaun prezidensiál 2027.

Jornalista: Osória Marques

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!