DILI, 21 abríl 2022 (TATOLI)— Diretór Administrasaun Finansa no Lojístika iha Hospitál Nasionál Guido Valadares (HNGV), Raul Humberto Gama, informa HNGV konsege ezekuta ona Orsamentu Jerál Estadu (OJE) 2022 ho 17% ne’ebé ekivalente ho orsamentu $1,848,695.73.
Orsamentu tinan fiskál 2022 alokadu ba HNGV hamutuk $11,170,875,000, ba kategária sálariu no vensimentu hamutuk $5,9921,132, bens servisu $3.915.956, kapitál menór $500,000 no kapitál dezenvolvimentu $599,787.
“Durante iha trimestre dahuluk hosi orsamentu orijen $11,170,875,000 ne’e ita ezekuta ona $1,848,695.73 ho nia persentajem ne’ebé mak ita ezekuta atinje ona 17%,” Diretór ne’e hateten ba Agência TATOLI iha nia knaar fatin HNGV-Bidaun, kuarta ne’e.
Orsamentu ba kategoria salariu no vensimentu, orijen hamutuk $5,9921,132 ne’ebé ezekuta ona hamutuk $1,139,129.84 (23%), bens no servisu hamutuk $3,915,956 ezekuta ona $512,320.72 (13%), iha kapitál menór hamutuk $500,000 hahú iha ona prosesu aprovizionamentu hodi sosa ekipamentu médiku no naun-médiku no item balun balun iha ona komitementu ne’ebé seidauk ezekuta.
Kona-ba kategoria kapitál dezenvolvimentu ne’e ho orsamentu orijen $599,787, maibé HNGV seidauk ezekuta ba konstrusaun sira tanba HNGV sei hein planu mestre.
“Tanba halo de’it ba iha reabilitasaun no expansaun ba fatin emodialia ne’ebé iha hela prosesu aprovizionamentu hodi sosa mákina hemodialize rua hodi atu hala’o atendimentu ba pasiente sira,” nia afirma.
Entretantu, Tuir portal transparánsia ne’ebé Agência TATOLI asesu hahaú hosi janeiru too abríl (21/04) orsamentu alokadu ba HNGV hamutuk $11.170.875 nia ezekusaun atinje ona 24,7% hanesan, komprimisiu sira $1,515,784.64, obrigasaun sira $81,012.30, atuál $2,681,358.11 no saldu $6,892,719.95 %.
“Orsamentu trimestre dahuluk Hospitál Nasionál Guido Valadaresezekuta ho ho dia’k,” nia afirma.
Notísia relevante: OJE 2022: CNFP Becora ezekuta 13% iha trimestre dahuluk
Jornalista : Felicidade Ximenes
Editór : Florencio Miranda Ximenes
