DILI,13 marsu 2022 (TATOLI) — Diretór Ezekutivu Klínika Bairru-Pité, Inácio dos Santos informa, pasiente sira hahú halo kontribuisaun $1 dolar liuhosi rejistrasaun naran.
“Ita hahú husu populasaun sira-nia kontribui $ 1 dolar hosi fulan-marsu to’o agora hodi selu ba profisionál saúde sira,” nia informa ba TATOLI iha nia kna’ar-fatin, sábadu ne’e.
Klínika Bairru-Pite husu kontribuisaun ba populasaun sira hahú iha fulan-marsu to’o agora kuaze besik rihun $2 no abríl populasaun sira kontribui besik rihun $2, agora maiu seidauk hatene montante osan tanba sei iha fulan klaran.
“Agora orsamentu hirak-ne’e ita selu ba profisionál na’in-24 ne’ebé mak laiha saláriu vensimentu, entaun ita fó sira-nia transporte kada fulan $75 dolar no orsamentu balun ba operasaun mina karreta, eletrisidade no buat seluk tán,” nia hateten.
Inácio dos Santos esplika, populasaun kontribui $ 1 dolar liuhosi rejista naran maibé la’ós obrigasaun.
“Durante iha fulan-marsu no abríl kada loron pasiente sira mai rejistu 200-resin maibé agora daudaun bailoron sira mai másimu 120,” nia katak.
Funsionáriu ne’ebé mak serbisu iha Klínika Bairru-Pité hamutuk 70-resin no konsege hapara 26 tanba orsamentu laiha atu selu, no daudaun sei ativu mak 50-resin.
Hosi númeru ne’e iha na’in-20 mak kobre programa HIV-SIDA no Tuberkuloze (TBC) tanba orsamentu mai husi fundu globál no funsionariu na’in-24 mak laiha saláriu vensimentu entaun pasiente sira halo kontribuisaun.
Jornalista : Felicidade Ximenes
Editór: Evaristo Soares Martins
