DILI, 07 jullu 2022 (TATOLI)—Koordenadór Servisu Lisensiamentu Publisitáriu Munisípiu Dili, Julio F. L do Rosario, relata iha fulan-abríl to’o maiu 2022 ne’e Servisu Lisensiamentu Publisitáriu Munisípiu Dili rekolla taxa publisidade hamutuk $11,209.04.
Nitisia Relevante: Janeiru-marsu: AMD rekolla taxa estasionamentu $7,488.80
“Iha fulan-abríl to’o maiu tinan ne’e, ita rekolla taxa publisidade hamutuk $11,209.04,” Julio F. L do Rosario informa ba Agência Tatoli iha nia knar fatin, Dili, kinta ne’e.
Ba fulan-juñu nian agora daudaun sei iha prosesu relatóriu tanba Servisu Lisensiamentu Publisitáriu Munisípiu Dili bainhira atu hamosu relatóriu presiza foti print aut hosi Banku mak foin relata ba iha relatóriu.
Maske nune’e, iha taxa atividade publisidade ne’e, Servisu Lisensiamentu Publisitáriu Munisípiu Dili rekolla iha área Avenida Nicoláu Lobato no Avenida Liberdade Imprensa ne’ebé mak iha kapitál Dili.
“Iha ne’e, agora daudaun ami la’o iha taxa publisidade kona-ba paines, kertas no toldu,” nia informa.
Kona-ba Autoridade Munisípiu Dili (AMD) menus fasilidade kobre taxa publisidade iha ona solusaun to’o agora seida’uk iha solusaun pozitivu.
“Tanba, ami-nia fasilidade hodi apoiu ba atividade agora daudaun ladun la’o di’ak, tanba ami-nia planu anuál hosi 2021 ne’ebé ami trasa ba 2022 ida-ne’e mós orsamentu la sufisiente, atu ami bele kobre ba atividade hirak ne’e,” nia dehan.
Planu hirak ne’e, Servisu Lisensiamentu Publisitáriu Munisípiu Dili halo fila-fali planu ida atu iha fulan ne’e halo destroisaun ba atividade paines ne’ebé agora daudaun laiha autorizasaun.
“Ami-nia planu hirak ne’e planeadu ona hosi planu trimestrál ba datoluk nian mós planeadu ona, atu oinsa iha loron 11 fulan-jullu ne’e atu enkontru ho SERVE, nune’e iha relasaun servisu. Ba fali 12 jullu, ami hakarak atu enkontru ho kompañia sira atu informa mós ba sira kona-ba atu halo destroisaun ba paines sira-ne’ebé durante laiha autorizasaun. Aleinde ne’e, ba fali iha 18 jullu, ami hakarak estabelese mós ekipa konjunta ida atu halo destroisaun iha 19 jullu,” nia dehan.
Maibé planu hirak ne’e dirije ona ba Dirasaun Jestaun Merkadu no Turizmu, maibé konfirma fali mai katak agora daudaun item ba halo destroisaun laiha, entaun labele halo buat ida, maske iha ona planu.
Jornalista : Nelia Fernandes
Editór : Cancio Ximenes
