BOBONARO, 09 agostu 2022 (TATOLI) – Autoridade postu administrativu Balibo, munisípiu Bobonaro, implementa atividade neen iha Programa Mão de Obra Postu Administrativu (PMOPA) faze dahuluk tinan 2022.
Administradór postu administrativu Balibo, Procopio Caero, haktuir programa refere hahú lansamentu iha loron 01 fulan-agostu ne’e envolve komunidade sira hosi suku neen ho totál traballador na’in-120 hosi totál grupu 12 kada grupu ema na’in-20.
Notísia relevante: Autoridade Bobonaro lansa programa PMOPA faze dahuluk
“Ami iha atividade neen, hamoos área turizmu ne’ebé mak agora iha Batugade, planu hamoos uma kiik-oan iha tasi-ibun, hamoos estrada ninin,hanesan iha Balibo Vila no suku sira seluk, no taka estrada ku’ak sira-ne’e, no estrada boot ba Dili,” nia informa ba jornalista sira iha edifísiu administrasaun munisípiu Bobonaro, tersa ne’e.
Enkuantu VIII Governu Konstituisonál implementa programa ne’e atu kapasita komunidade, empodera no hakbiit rekuperasaun ekonómika liuhosi atividade limpeza iha estrada rurál no urbana, hamoos valeta, ateru no taka estrada ku’ak hodi fasilita movimentasaun transporte públiku no atividade ekonomia.
Administradór ne’e konsidera programa ne’e kapás tebes tanba benefísia direta ba povu hodi hakbiit sira-nia ekonomia família ba nesesidade loron.
“Ne’e presiza duni atu hatudu katak estadu hanoin ona, orsamentu ba ekonomia ne’e tenke ser afeta duni ba povu,” nia saliente.
Munisípiu Bobonaro hetan alokasaun orsamentu hosi Ministériu Administrasaun Estatál (MAE) ho montante rihun $698.497,98 liuhosi Orsamentu Jerál estadu (OJE) tinan fiskál 2022 no postu administrativu Balibo rasik iha faze dahuluk ne’e hetan rihun $114-resin.
Tuir dadus monografia 2021, postu administrarivu Balibo iha aldeia 27, ho totál suku neen mak hanesan, Sanirin, Cowa, Leo-Lima, Leo-Hitu, Balibo Vila no Batugade ho totál populasaun 19,869 no totál uma-Kain 4,708.
Notísia relevante:PAM Bobonaro husu traballadór PMOPA serbisu ho loloos
Jornalista : Sérgio da Cruz
Editór : Evaristo Soares Martins
