DILI, 23 agostu 2022 (TATOLI)—Jornalista Seniór no atuál Komisáriu Konsellu Imprensa (CI, sigla portugés), Otelio Ote, husu ba jornalista foin-sa’e sira tenke haburas mundu mídia hahú hosi nasionál to’o munisípiu.
“Jornalista sira presiza haburas mundu mídia iha era agora tanba la hanesan ona ho tempu uluk, agora era dijitalizasaun, tanba ne’e jornalista foin-sa’e presiza haburas mídia ne’e hahú hosi nasionál to’o munisípiu. Ha’u-nia mensajen ba jornalista iha era agora presiza aplika liafuan tolu hanesan haburas, hametin no harii,” Otélio Ote hateten ba Agência Tatoli, iha ninia knaar fatin, Bebora, segunda ne’e.
Notísia relevante: Rosa Garcia husu jornalista foin-sa’e sira labele baruk atu apreende
Nia dehan, liafuan tolu ne’e importante tebes ba jornalista foin-sa’e sira tanba liafuan ida bolu haburas jerasaun, ne’ebé balun moris mai iha tempu haburas no jerasaun balun moris mai iha tempu hametin hanesan ema barak hahú kursu jornalizmu iha tinan 2002 mai iha era hametin nian.
“Tanba ami harii no koko hametin tiha ona jornalista ne’e iha tempu uluk kedas, entaun jerasaun foun agora presiza haburas tanba ita tama ona iha mundu foun, bainhira organizasaun metin iha etapa tolu hanesan hametin, haburas, no harii,” nia akresenta.
Kona-ba harii, agora iha hotu ona regra lei kódigu étika no uma fatin di’ak ne’ebé la’o tuir no kada instituisaun mós iha regulamentu internál ne’ebé kada jornalista sira bele la’o tuir nune’e bele haburas ona mundu mídia, tanba bele hetan oportunidade tuir formasaun oinsá sai jornalista di’ak.
“Liuhosi buat sira ne’e maka kontinua haburas mundu mídia la’ós ona ba Dili de’it, maibé ita tenki loke to’o ba munisípiu tanba ohin loron tama ona dijitál importante mak jere karakter hakerek, respeita ema la’ós tanba jornalista ona ne’ebé naran hakerek de’it labele tuir ninia karater,” nia hameno.
Tuir Otelio Ote, karakter ne’e importante tebes tanba ikus ne’e karakter jornalista sira balun arbiru no balun tama ona iha partidu nia-laran hodi ko’alia mai hanesan ema polítiku ba partidu ida, ne’ebé labele ona hanesan jornalista profesionál.
“Jerasaun foun kontinua haburas mídia no respeita karakter. Tanba ne’e, presiza loke kursu barak hodi halo formasaun nível kraik to’o leten hodi ajuda kolega sira balun ne’ebé laiha mídia fó servisu iha munisipiu sira mak la’o hamutuk karakter ne’ebé la’o tuir kódigu jornalista nian nune’e bele lori mídia ne’e la’o bá oin hodi ema fó fiar nafatin ba ita,” jornalista seniór ne’e fó hanoin.
Jornalista : Arminda Fonseca
Editora : Julia Chatarina
