HEADLINE, KAPITÁL, NASIONÁL

Rosa Garcia husu jornalista foin-sa’e sira labele baruk atu apreende

Rosa Garcia husu jornalista foin-sa’e sira labele baruk atu apreende

Rosa Garcia (klaran) no Suzana Cardoso (dahuluk hosi liman-loos) inklui jornalista seluk tan halo entrevista ho Lere Anan Timur. Imajen/Espesiál

DILI, 19 agostu 2022 (TATOLI)—Jornalista Seniór, Rosa Garcia, husu ba foin-sa’e sira ne’ebé hili dalan hakarak sai jornalista tenke lee barak no labele baruk atu apreende.

“Ha’u husu ba jornalista foin-sa’e sira ne’ebé hili dalan hakarak sai jornalista tenke pasiénsia, lee, apreende barak no tenke konsidera dalan ne’ebé ita-boot sira hili hanesan vokasaun ida, nune’e bele lori sai jornalista profisionál no hadomi profisaun,” Rosa Garcia hateten ba Agência Tatoli, iha Bidau Tahu-Laran, sesta ne’e.

Notísia relevante: Jornalista na’in-20 simu sertifikadu hafoin finaliza formasaun Matemátika

Nia dehan, jornalista iha era agora tenke iha vontade apreende barak no lee inklui rona barak hosi seluk, kompara ho jornalista tempu uluk la hanesan tanba tempu uluk iha limitasaun barak, liuliu bainhira invazaun indonézia, jornalista timor-oan sura ho liman fuan no menus informasaun ba área jornalístiku maibé ho mentalidade ne’ebé iha bele hala’o knaar hanesan jornalista hodi hala’o profisaun iha Timor-Leste nia luta ba independénsia.

“Ita atu sai jornalista tenke hanoin katak profisaun jornalista ne’e konsidera hanesan vokasaun ida ba o nia-an, atu nune’e bele hala’o knaar ho profisionalizmu, klaru era agora osan sai razaun maibé atu sai jornalista profisionál tenke konsidera hanesan vokasaun nune’e osan ne’ebé o hetan kiik ka boot, ba o la importante ona entaun hosi ne’e enkoraja atu hadi’a-an,” Jornalista seniór ne’e fó hanoin.

Nia haktuir, durante envolvimentu iha luta hakotu Timor-Leste nia destinu, liuliu hala’o knaar nu’udar jornalista iha loron 30 agostu 1999, momentu ne’ebá nia sai nu’udar jornalista ho modalidade hakerek de’it no momentu ne’ebá apreende halo deskrisaun ba situasaun ida.

“Entaun, ho ida-ne’e mak enkoraja ha’u gosta hakerek no lori ha’u to’o mai agora, signifika ha’u bele imi mós bele tanba ne’e esforsu-an apreende barak iha vida jornalista ne’e oinsá atu tau-an nu’udar jornalista profisionál, katak tenke neutru no labele haliis bá-mai,” nia hameno.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!