DILI, 05 agostu 2022 (TATOLI)— Sentru Formasaun Téknika Komunikasaun (CEFTEC-sigla portugés) hamutuk ho Parceria para Melhoria da Gestão e Supervisão das Finanças Públicas (PFMO C2) “Osan Povu Nian, Jere ho Diak” no Consultório da Língua para Jornalista, atribui sertifikadu ba jornalista nasionál na’in-20, ne’ebé finaliza ona formasaun iha área Matemátika.
Formasaun ne’ebé hala’o durante oras 81, hahú hosi loron 5 jullu to’o 5 agostu 2022 ne’e ho objetivu atu kapasita jornalista nasionál sira hodi halo identifikasaun ba forma kálkulu no intrepretasaun indikadór relevante sira liuliu halo analiza ba finansa públika no impaktu indikadór iha finansa públika sira iha Timor-Leste.
Iha formasaun ne’e foku ba matéria hanesan númeru no operasaun, proporsionalidade direta, unidade ba medida, organizasaun no tratamentu dadus no eskrita simplifikada atu konsolida, intrepreta no redasaun konseitu sira relasiona ho analiza finansa públika sira.
Nune’e mós, halo konsolidasaun no utilizasaun formula sira relasiona ho análiza no halo gráfiku ba finansa públika sira liuhosi funsaun Microsoft Excel.
Ho nune’e, Kordenadór Jerál CEFTEC, Rafael da Silva hato’o nia kongratulasaun ba PFMO C2 “Osan Povu nian, Jere ho Di’ak” ne’ebé oferese ona formasaun iha área matemátika ba jornalista
“Lori Ministru Asuntu Parlametár no Komunikasaun Sosiál (MAPKOMS) nia naran. Ha’u husu ba ita bo’ot sira atu prátika ba matéria sira ne’ebé hetan ona iha formasaun ne’e iha ita boot sira nia serbisu lorloron nu’udar Jornalista,” Kordenadór Jerál CEFEC ne’e hateten liuhosi nia intervensaun iha ámbitu enseramentu no atribuisaun sertifikadu ba jornalista nain-20 ne’ebé tuir formasaun matimátika ba jornalista iha Pateo-Dili, Sesta ne’e.
Tanba, MAPKOMS liuhosi CEFTEC kontinua koopera ho parte Institutu Camões liuhosi sira nia projeitu Konsultóriu Língua ba Jornalista (CLJ, sigla portugés ), no Uniaun Europeia liuhosi PFMO-C2 atu kontina kapasita jornalista timor-oan iha área oin-oin hodi eleva koñesimentu atubele mellora produtu jornalístiku liuhosi notísia.
Iha biban ne’e, Koordenadora Adjunta PFMO ne’ebé trata ba asuntu Finansa Públika, Maria Jesus Fátima Gomes Andrade, kongratula formandu nain-20 ne’ebé konsege tuir formasaun matemátika ba jornalista durante fulan ida.
“Parabéns ba ita bo’ot sira, ha’u hanoin formasaun ida ne’e importante tanba bele ajuda ita bo’ot sira atu eleva koñesimentu no abilidade oinsá hakerek notísia sira liga ba dadus iha futuru,” Koordenadora ne’e kongratula.
Reprezentante Konsultóriu Língua ba Jornalista (CLJ, sigla Portugés), Samba Ndiay, mós kongratula ba jornalista nain-20 ne’ebé tuir formasaun matimátika ba jornalista durante fulan ida ho di’ak tebes.
“Ita bo’ot sira nia vontade bo’ot tebes. Nune’e parte CLJ promote sei kontinua fó apoia másimu ba formasaun sira hanesan ne’e, ba jornalista no instituisaun Estadu nian hodi eleva sira koñesimentu iha hakerek notísia liga ba dadus no kontajen,” nia airma.
Entretantu, Formadora Joana Cunha, hateten hanesan formadora rekoñese durante formasaun matemátika ba jornalista hasoru difikudade barak, liuliu oinsá buka maneira hanorin ne’ebé di’ak ba jornalista sira bele entende iha aula laran. Tanba material mátimatika ne’e difisil tebes atu entede lalais
“Maibé, parabéns ba imi hotu. Tanba imi hatudu imi nia vontade aprende duni durante fulan ida. Ha’u husu buat ida de’it ba imi (jornalista sira) ita bele implementa iha prátika ba saída mak durante ne’e imi hetan iha aula formasaun nia,” Fromadora ne’e enkoraja.
Jornalista: Natalino Costa
Editór : Florencio Miranda Ximenes
