OÉ-CUSSE, 12 setembru 2022 (TATOLI)- Autoridade Rejiaun Administrativa Espesiál Oé-Cusse Ambeno (RAEOA), segunda ne’e halo lansamentu agradesimentu ba viajen dahuluk hosi ró Success ne’ebé hola hosi empreza lokál Irmão Timor Unipesoál Lda nu’udar Oé-Cusse oan, ho moto, ‘mehi sai realidade, hahú ohin hamutuk ita lori Timor-Leste ba oin espesialmente Oé-Cusse Ambeno’.
Iha serimónia lansamentu ne’e, Prezidente Autoridade RAEOA, Arsénio Paixão Bano, orgullu ho família emprezáriu Irmão Timor, tanba berani tebes hodi aproveita duni fasilidade ne’ebé mak Estadu halo tiha ona, liuhosi parseiru BNCTL, nune’e bele fasilita transporte marítima ba povu Oé-Cusse hodi sai hosi izolamentu nia laran.
“Ha’u hanoin ne’e orgullu boot, segundu ne’e hanesan primeiru investimentu ida karatér boot hosi emprezáriu nasionál no lokál, tanba rejiaun ida berani foti risku no berani investe iha transporte marítima, ida-ne’e hatudu katak sei hasai povu Oé-Cusse hos izolamentu,” Arsénio Bano, informa ba jornalista sira iha portu Kitahara, Mahata, Oé-Cusse.
Tuir nia haree, transporte marítima nu’udar poténsia tebes tanba ró Success ne’e, sei ajuda dezenvolvimentu iha Oé-Cusse barak, tanba ró Succes ho pasajeiru, sei lori sasán barak, entaun oportunidade di’ak.
Tanba iha fulan-setembru ne’e, autoridade RAEOA lansa ona projetu boot rua, ba estrada nasionál pakote I hosi Ponte Noefefan, sub-rejiaun Pante Makasar to’o Oénunu, suku Suni-Ufel liga Citrana sub-rejiaun Nítibe, nune’e mós iha tempu badak sei lansa tán estrada nasionál pakote I hosi eis merkadu Tono, suku Cunha, sub-rejiaun Pante Makasar to’o suku Bobometo, sub-rejiaun Oésilo.
“Projetu boot rua ne’e presiza halo movimentasaun ba bens (sasán) sira-ne’ebé maka presiza ba dezenvolvimentu iha rai-li’ur, entaun ró ne’e sei ajuda barak iha RAEOA,” nia katak.
Nune’e nia reprezenta populasaun RAEOA agradese ba empreza Irmão Timor tanba iha korajen atu investe ne’e iha setór marítima.
“Ha’u bele hatete RAEOA iha semana ne’e mós halo akordu ho empreza estatál Timor-Gap atu halo investimentu iha estasaun kombustível, ha’u hanesan Prezidente Autoridade orgullu tanba iha mumentu sertu iha emprezáriu ida hakarak investe iha área setór marítima, tanba Oé-Cusse presiza tebes atu sai hosi izolamentu,” nia orgullu.
Nune’e atu sai hosi izolamentu ne’e, transporte marítima tenke rezolve ho transporte aéreu ninian, Oé-Cusse iha aviaun ZEESM fasilita operasaun kada loron, ho hatama reseita ba kofre Estadu, no mós transporte terrestre, entaun transporte ida-ne’e importante tebes.
Diretór empreza Irmão Timor, Júlio Mack, orgullu ho prezensa transporte marítima ne’e bele hakmaan sofrimentu povu Oé-Cusse, tanba durante ne’e halerik beibeik ba transporte marrítima, tanba daudaun ne’e Timor-Leste iha ona ró operasaun tolu, Berlin Nakorma, Berlin Ramelau ho Success, bele koloka hamutuk, hodi bele fasilita povu sai hosi izolamentu, liuliu ba Oé-Cusse.
“Ha’u-nia mehi mak agora akontese ona sai realidade, ida-ne’e mak ha’u fó ba povu Oé-Cusse ho Atauro, no ha’u garante sei laiha problema, tanba nia kalendáriu operasaun sei hala’o ho loron tersa no sesta hosi Dili-Oé-Cusse ba mai, no kinta ita ba Atauro, ne’e ha’u garantia to’o tinan rua ami sei dokin subsitui ba ró refere ne’ebé mak ami hatama atubele troka dokin,” nia afirma.
Emprezariu Oé-Cusse oan ne’e informa, presu ba billete operasaun ba mai Díli Oé-Cusse $12, viajen Dili-Atauro $7, no mós sei envolve pasajeiru hamutuk 370, ho transporte rodaviariu hamutuk karreta ho motorizada 50.
Prezidente Konsellu Administratasaun Banku Nasionál Komérsiu Timor-Leste, António Victor, hatete, hanesan banku estatál, sempre iha inisiativa apoia setór privadu, kona-bá investimentu.
“Ita hotu orgullu tanba iha Oé-Cusse oan ida bele iha korajen hakarak foti insiativa foti risku halo investimentu ida-ne’e, hamutuk ho BNCTL no Autoridade RAEOA ita hotu, ami haree katak nesesidade ba dezlokasaun entre Oé-Cusse ho rai boot, ne’e importante tebes,” nia katak.
Notísia relevante: Empreza Irmão Timor hosi Oé-Cusse sai na’in ba ró success
Jornalista: Abílio Elo Nini
Editór: Evaristo Soares Martins
