DILI, 16 setembru 2022 (TATOLI)—Vise-Ministru Administrasaun Estatál (MAE), Lino de Jesus Torrezão, informa daudaun ne’e MAE simu ona dadus provizóriu xefe familia hamutuk rihun 400- hosi territóriu nasionál atu simu subsídiu $200 ba uma kain ida iha tinan 2022 nia rohan ne’e.
Notísia Relevante: PR Lú Olo promulga subsídiu $200 ba Uma-Kain
“Totál dadus ne’ebé daudaun iha, bazea ba de’it ita-nia dadus la’ós haree hosi dadus sensu populasaun nian maibé dadus ne’ebé sira hato’o mai. Globalmente to’o agora ita atu hateten katak iha rihun $400-resin xefe família ne’ebé atu hetan osan ba fim do ano nian. Ida-ne’e, foin tama, bele liu ida-ne’e, tanba ida-ne’e seidauk final. Ne’ebé, ha’u hateten de’it hein to’o bele halo oinsá mak ita atu fináliza dadus ne’e,” Lino de Jesus Torrezão hateten ba Agência Tatoli, iha salaun Ministériu Saúde (MS) Caicoli, Dili, sesta ne’e.
Tuir nia, dadus ne’e agora iha hela faze levantamentu no faze daruak dadus ne’e sira hosi líder komunitáriu sira hato’o hosi ne’ebá mai, liuhosi postu mai munisípiu no munisípiu haruka diretamente mai iha Dirasaun Jerál Desentralizasaun Administrativa, depois iha ninia dirasaun ida-ne’ebé mak bele toma responsabilidade kona-ba dadus sira-ne’ebé mak mai.
“Iha aprezenta dadus ne’e, balun satisfeitu no balun lae, tanba balun naran iha no balun naran la iha,” nia dehan.
Maske nune’e, nia hateten subsídiu $200 ba uma kain ne’e ba ema hotu-hotu atu hetan, tanba ida ne’e dehan subsídiu fulan ikus ba tinan nia rohan.
“Agora benefisiáriu ne’e ba xefe familia sira-ne’ebé mak iha no atu hateten lolos katak osan $200 ne’e ba ema hotu-hotu hetan, hanesan ba xefe família no mós xefe família sira-ne’ebé iha klase elite, hanesan ami Vice-Ministru sira no Diretór Jerál mós hetan hotu, la hanesan sira uluk ne’ebé iha,” nia dehan.
Tanba ida-ne’e ema dehan subsídiu fim do ano nian, ne’ebé ema hotu-hotu hetan no iha dekretu-lei ne’e hateten klaru kedas ona.
Ne’ebé, nia informa, dadus agora iha hela selesaun laran no MAE halo hela verifikasaun no tuir dadus ne’ebé tama, balun iha ona sesta bázika, balun ne’ebé uluk simu ona osan $200 liubá, sira ne’e mak atu tau hamutuk maibé nia límete ba dadus sira-ne’ebé atu hatama to’o 29 fevereiru de’it, ida liu to’o ohin laiha ona.
Jornalista : Nelia Fernandes
Editór : Cancio Ximenes
