OÉ-CUSSE, 30 novembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kuarta ne’e hatuur fatuk dahuluk ba konstrusaun Sentru Formasaun ba profesór sira nu’udar investimentu ba setór edukasuan ba futuru bele hasa’e kualidade ba manorin sira iha rejiaun Oé-Cusse.
Konstrusaun ba Sentru Formasaun Profesór ne’e, lokaliza iha iha bairru Santa-Rosa, aldeia Oésono, suku Costa, sub-rejiaun Pante Makasar, ho medida konstrusaun ne’e nia luan sentimetru 9,50 ho nia naruk metru 50.
Nune’e mós kompleta kedas ho fasilidade sira hanesan, fatin formasaun sala neen (6) komposta hosi sala ba komputadór, sala ba formasaun profesór, sala ba formadór sira, sala laboratóriu kona-bá prátika nian, sala ba formadór sira, no mós sala kantina ida no kompleta mós ho fasilidade seluk tán.
Adjuntu Prezidente Autoridade RAEOA ba asuntu Sosiál, Maximiano Neno, informa, konstrusaun ba sentru formasaun ne’e importante tebes hodi harii atu sai nu’udar investimentu ba setór edukasaun hodi hasa’e kualidade manorin sira liuhosi kapasitasaun no formasaun iha nível prosesu ensinu aprendizajen.
“Tanba durante ne’e Oé-Cusse seidauk iha sentru apropriadu atu realiza formasaun ba profesór sira, realidade durante formasaun hosi INFORDEPE muda hosi ida ba fatin seluk, nune’e Autoridade RAEOA konsidera iha ezijénsia ida atu harii sentru formasaun ida ba profesór sira hodi sai hanesan investimentu ba setór edukasaun atu garante kualidade ba manorin sira liuhosi kapasitasaun no formasaun,” Maximiano Neno, ko’alia iha serimónia hatuur fatuk dahuluk.
Tan ne’e polítika Autoridade RAEOA hamosu inisiativa hodi harii sentru formasaun ida-ne’e atu fasilita formasaun hotu-hotu ne’ebé maka Sekretaria Rejionál ba Asuntu Edukasaun no Solidariedade Sosiál, sei hala’o iha futuru.
“Sentru formasaun ne’e la minimiza sentru formasaun seluk, hanesan saúde, agrikultura no liña Sekretáriu Rejionál sira ba setór seluk, maibé sentru formasaun ba profesór ne’e haree iha duni ezijénsia, primeiru ita konsidera númeru profesór no estudante iha Oé-Cusse kada tinan aumenta, entaun ita tenke iha fatin própriu ida ba manorin sira atu hasa’e tan sira-nia matenek liuhosi formasaun oioin,” nia afirma.
Diretór Rejionál Infrastrutura (DRI), Candido dos Reis Amaral, espera konstrusaun ne’e sei ezekuta tuir dokumenu kontratu ne’ebé iha, no tenke garante kualidade obra, nune’e bele sai fatin buka matenek ba profesór sira iha Oé-Cusse.
“Hosi DRI, só hakarak fó hanoin de’it ba tékniku sira liu-liu hosi empreza, atu koordena nafatin serbisu kona-bá preparasaun dezeñu no parte fiskalizasaun nian, entaun iha parte fiskalizasaun sei halo hosi DRI liuhosi servisu edifikasaun hamutuk ho tékniku sira hosi edukasaun atu garante obra ne’e la’o tuir dezeñu ne’ebé iha, importante liu maka empreza iha obrigasaun tomak atu oferese obra ne’e ho kualidade tuir BoQ ne’ebé iha,” nia fó hanoin.
Entretantu, konstrusaun ne’e ezekuta hosi empreza Irmão Timor Unipesoál Lda, ho númeru kontaru, RFP: RAEOA ZEESM-TL SRF/UAL/2022-12 ho valór kontratu hamutuk $374.755.81, osan ne’e Autoridade RAEOA prevee hosi Orsamentu Jerál Estadu (OJE) 2022 nian.
Purantu durasaun ba konstrusaun ne’e fulan haat, hahú hosi novembru sei konklui iha fulan marsu 2023.
Notísia relevante: RAEOA sei harii Sentru Formasaun ba profesór sira
Jornalista: Abílio Elo Nini
Editór: Evaristo Soares Martins
