DILI, 05 dezembru 2022 (TATOLI)—Governu liuhosi Ministériu Solidariedade Sosiál no Inkkuzaun (MSSI), tersa (06/12) hahú lansa dahuluk pagamentu subsídiu fim do anu $200 ba uma kain iha suku Becora, Camea, Lahane Osidentál no suku Comoro, munisipiu Dili.
Notísia Relevante: MSSI deside data tentativa pagamentu subsídiu $200 iha 06 dezembru
Hafoin lansamentu ne’e, ekipa pagamentu kontinua hala’o kedas pagamentu ba uma kain elizivél maibé ba munisípiu sira seluk inklui RAEOA, pagamentu sei realiza iha loron 12 dezembru 2022 no tuir kalendáriu pagamentu subsídiu ida-ne’e sei ramata iha 22 dezembru 2022.
“Bazea ba Dekretu-Lei Nú. 37/2022, 25 maiu, ne’ebé mak hetan alterasaun hosi Dekretu-Lei Nú. 82/2022, 11 nvembru, katak uma kain ka benefisiáriu sira-ne’ebé mak elizivél ba programa subsídiu fim do ano mak uma kain hirak ne’ebé laiha ninia membru uma kain hetan rendimentu fulan- fulan ho forma regular $500 ka liu, nomós uma kain ne’ebé rejistu ona iha livru rejistu suku iha teritóriu nasionál to’o loron 28 fevereiru 2022,” Diretór Jerál Administrasaun no Finansa MSSI, Rui Manuel Gago Exposto, hateten liuhosi komunikadu imprensa ne’ebé Agência Tatoli asesu , segunda ne’e.
Diretór Jerál reforsa, benefisiáriu hotu-hotu ne’ebé elizivél sei prenxe formuláriu deklarasaun rendimentu ki’ik hosi $500 ka liu, iha fatin pagamentu molok simu pagamentu subsídiu refere.
Ba benefisiáriu sira-ne’ebé ho rendimentu $500 no nia simu subsídiu ida-ne’e, mak nia sei sujeitu ba responsabilidade kriminál tuir lei haruka.
Atu realiza pagamentu ida-ne’e, MSSI servisu hamutuk ho Banku Nasionál Komérsiu Timor-Leste (BNCTL, Sigla Portugés) hodi transporta osan ba Postu Administrativu sira, hafoin autoridade munisipál ho ekipa pagamentu sei ba foti osan ne’e hodi ba iha suku hanesan fatin ba pagamentu nian.
Tuir dadus finál ne’ebé Ministériu Administrasaun Estatál (MAE) envia ba MSSI ne’e iha totál benefisiáriu hamutuk 339,954 uma-kain mak elizivél ba subsídiu ida-ne’e.
Notísia Relevante: MSSI husu membru família saláriu liu $500 rezeita simu subsídiu $200
Jornalista : Nelia Fernandes
Editór : Cancio Ximenes
