DILI, 20 dezembru 2022 (TATOLI)–Diretór Jerál Administrasaun Finansa ba Ministériu Solidariedade Sosiál no Inkkuzaun (MSSI), Rui Manuel Gago Exposto, hateten ekipa pagamentu hosi MSSI halo ona pagamentu subsídiu fim do ano $200 ba uma kain iha territóriu nasionál ne’e hamutuk 208.619.
Notísia Relevante: Ema ho Defisiénsia besik 10.000 mak asesu subsídiu hosi Governu
“To’o ohin loron ekipa pagamentu MSSI nian selu ona uma kain hamutuk 208.619 ho osan hamutuk $41.723.800,” Rui Manuel Gago Exposto hateten ba Agência Tatoli, iha nia kna’ar fatin Caicoli, tersa ne’e.
Pagamentu ba subsídiu ne’e iha ona tanba pagamentu ba subsídiu fim do ano $200 ba uma kain ne’e atinje ona 61.4% ho ekivalénsia ho númeru hamutuk $208.619.
Pursentu restu ne’e, nia dehan, maiória hosi suku ualu iha Dili mak hanesan Becora, Vila Verde, Bairro Pite, Manleuana, Comoro, Fatuhada, Madohi no Bebunuk mak seidauk hotu tanba ema barak liu.
Maibé iha munisípiu seluk barak mak hotu ona no entrega ona osan hanesan Manatuto, Baucau, Lautém no seluk tan.
Maibé nia rekoñese katak sei la konklui iha 23 fulan-desembru ne’e tanba iha família ne’ebé naran laiha lista maibé MSSI planu sei prolonga tan loron pagamentu, nune’e bele konklui tiha pagamentu refere.
“Bainhira la finaliza, ita sei aumenta loron tanba ida-ne’e ema-nia direitu maibé ita pauza tiha lai depois kontinua fali fulan oin,” nia dehan.
Antes ne’e , Governu liuhosi reuniaun Konsellu Ministru, halo ona alterasaun dahuluk ba dekretu-lei númeru 37/2022, 25 maiu, kona-ba subsídiu fim do ano $200 ba uma kain ho valór $200 hodi klarifika ba aplikasaun, ne’ebé antes ne’e uma kain hotu iha territóriu tomak sei sai benefisiáriu maibé ho alterasaun dekretu-lei ne’e, mak atribuisaun ba de’it uma kain ne’ebé nia membru nia saláriu mensál la liu $500.
Tuir dadus haktuir katak, dadus uma kain iha territóriu nasionál ho totál hamutuk 39.000 ba MSSI ho totál pagamentu millaun $7,8.
Jornalista : Osoria Marques
Editór : Cancio Ximenes
