OÉ-CUSSE, 03 fevereiru 2023 (TATOLI) – Iha fulan janeiru 2023, Departamentu Eletrisidade Timor-Leste (EDTL) iha Rejiaun Administrativa Espesiál Oé-Cusse Ambeno (RAEOA), rekolla ona reseita ba kofre Estadu hamutuk $17.542.00 liuhosi fa’an pulsa ba prepagu.
“Ita hahú uza prepagu iha 2015 to’o agora 2023, espesífiku janieu tinan 2023 ne’e agora ita hetan ona $17,542.00, iha tinan kotuk 2022 rekolla $360,861.77,” Xefe departamentu EDTL Oé-Cusse, Armindo Maria Mendonça, informa ba jornalista sira iha edifisíu EDTL Oé-Cusse, sesta ne’e.
Dezde 2015 to’o 2023, EDTL Oé-Cusse konsege rekolla millaun $1-resin ($1,896,585.02) hatama ba kofre Estadu. Maibé ida-ne’e simu hosi sistema ne’ebé EDTL fa’an la inklui token sira seluk, tanba balu bele hola iha Timor-Telecom, mosan, hola hosi Díli no loja balun.
“Ita-nia totál prepagu iha Oé-Cusse kuaze rihun-neen (6000) maka komunidade sira uza ona, nota ne’e mós la envolve multa tanba dada ilegál, ne’e taxa ba prepagu nian ne’ebé fa’an liuhosi sistema EDTL nian,” nia afirma.
Nia fundamenta, daudaun ne’e konsumidór ne’ebé uza só de’it iha zona sentrál sub-rejiaun Pante Maaksar, iha sub-rejiaun seluk Oésilo Pássabe no Nítibe seidauk monta, tanba parte EDTL sei rekolla hotu dadus kada transformadór sira maka foin halo sensibilizasaun ba komunidade molok halo instalasaun.
“Bainhira iha monta ona, parese ita uza de’it MCB ampere, ita sei implementa bazea regulamentu ne’ebé antes ne’e autoridade anunsia ona ba iha públiku sei selu kada ampere,” Armindo Mendonça hateten.
Nia haktuir, durante ne’e difikuldade ne’ebé EDTL Oé-Cusse enfrenta maka komersiál no distribuisaun, tanba sistema kontrolu no sentraliza hosi EDTL nasionál, entaun dalaruma akontese sistema monu presiza tempu konsulta ho nasionál.
Nune’e afeta ba komersiante sira dalaruma lamenta no mós dalaruma meteran falla, entaun presiza númeru baixu-tensaun sei konsulta mós ba nasionál, hein tempu maka foin bele hadi’a kontadór. Maibé sei kontadór ladi’ak monta fali foun.
Kona-bá distribuisaun, liña elétrika sempre avaria tanba kuza dezastre nastutál, nune’e bele akontese ahi mate.
“Maibé difikuldade sira-ne’e ami iha estratéjia oinsá atu miniza problema sira-ne’e, hodi fó satisfasaun ba konsumidór sira,” nia katak.
Totál taxa ne’ebé rekolla hahú hosi 2015 to’o 2023 ne’e hamutuk $1.896,585.02, komposta hosi 2015 rekolla $84,588.15, iha 2016 rekolla $180,485.00, iha 2017 rekolla $273,800.85.
Nune’e mós iha 2018 rekolla $315,080.31, iha 2019 rekolla $248.586.61, iha 2020 rekolla $156,624.65, iha 2021 rekolla $276,557.68, ba fali 2022 rekolla $360,861.77 no iha janeiru 2023 EDTL rekolla ona $17,547.00.
Totál funsionáriu ne’ebé presta serbisu iha Departamentu Eletrisidade Oé-Cusse hamutuk na’in-63 komposta hosi permanente no kontratadu.
Jornalista : Abílio Elo Nini
Editór : Evaristo Soares Martins
