DILI, 20 marsu 2023 (TATOLI) – Xefe Departamentu Forensik Hospitál Nasionál Guido Valadares (HNGV) Nilton Tilman, hateten HNGV sei hein mandadu husi Ministériu Publiku (MP) hafoin halo autopsia ba kazu omesídiu ne’ebé horikalan akontese iha área Kulau, Aldeia Mota ulun Suku Becora Postu Administrativu Cristo Rei Munisípiu Dili.
”Ami seidauk halo autopsia kazu omesídiu iha Becora tanba karta mandadu seidauk mai husi MP”, Nilton Tilman, dehan ba jornalista sira iha HNGV.
Nia dehan, se karik mandadu mai ona HNGV halo autopsia ba matebian Eduardo da Costa hodi entrega ba família.
“Bainhira mandadu ne’e mai ona husi MP mak ami teknikamente organiza família hodi halo autopsia, hafoin mak ita entrega ba família”, nia afirma.
Iha fatin hanesan, Diretór Klíniku iha HNGV Marcelino Correira, dehan akontesimentu ne’ebé mak mosu iha Becora, iha vítima na’in tolu, família sira lori mai iha emerjénsia HNGV hodi halo tratamentu maibé ida la konsegue salva vida.
”Husi na’in tolu ne’ebé família sira lori mai iha tuku 10 resin kalan, mai iha emerjénsia ho kondisaun todan la kleur ida Eduardo da Costa lakon vida”,
Marcelino Correira informa.
Nia esplika, profisionál saúde sira fó tratamentu maibé ida mak la konsegue salva nia vida ho problema sériu ne’ebé sona iha hirus matan tanba liga ho pulmaun ne’ebé mak makas entaun ida ne’e mak rezulta mate.
Na’in rua ne’ebé baixa mak naran Rogeiro do Santos idade 21 ne’ebé hetan sona iha hirus matan daudaun sei simu tratamentu iha sirurjiaun feto no ida seluk Benjamin da Costa idade 32 ne’ebé hetan sona iha kabas, daudaun ne’e baixa iha sirurjiaun mane.
Nune’e, aman husi Matebian Eduardo da Costa hateten akontesimentu ne’e horikalan entre joven ho joven iha bairo laran iha Aldeia Mota Ulun Suku Becora Postu Administrativu Cristo Rei.
”Ha’u nia oan matebian ne’e atu mai bolu nia maun atu mai rezolve problema mak sira halai ba taka mate hotu ahi hodi sona matebian ne’e monu nia maun halai tuir sona monu tan no nia subriñu halai tuir ba sona monu entaun nain tolu ne’e kanek grave depois ami família lori mai ospitál ida mak la konsegue sala nia vida no rua seluk sei halo hela tratamentu nia laran”, aman hosi matebian haktuir.
Tanba ne’e, família matebian husuEstadu atu prosesu kazu ne’e ba oin no labele husik kriminozu sira hodi halo rai ne’e la hakmatek.
Notísia relevante : http://Kazu omesídiu Kulau, PNTL detein supeitu na’in tolu
Jornnalista: Felicidade Ximenes
Editór : Zezito Silva
