MALIANA, 22 abríl 2023 (TATOLI)– Partidu Demokrátiku (PD) lideradu Mariano Assanami Sabino, promete hasa’e saláriu mínimu ba $200 no fasilita kréditu ba joven no estudante sira bainhira hetan votu konfiansa hosi povu iha eleisaun parlamantár, 21 maiu tinan 2023.
“Bainhira PD kaer ukun tinan lima mai, PD sei tau prioridade hasa’e saláriu mínimu ba traballadór ba $200 tanba ne’e kompromisu PD nian kada tinan lima dala-ida ne’ebé seidauk realiza,” Assanami perante ba militante, apoiante no simpantizante sira iha kampu futeból Maliana, munisípiu Bobonaro, sábadu ne’e.
Partidu Demokrátiku nia Planu ne’e nu’udar planu governasaun tinan lima nian, ne’ebé partidu balun kópia ona kompromisu hirak-ne’e.
“Maibé ita sei koalia ita-nia kompromisu sira ne’e nakonu ho elementu setór hotu-hotu; ba joven, ferik, katuas sira, ba ekonomia, polítika no infraestrutura,” nia informa ba povu iha Bobonaro.
Bainhira PD hetan vitória iha eleisaun lejizlativa tinan ne’e hodi forma governu mak sei kria koperativa ba negosiante sira-ne’ebé ho rendimentu kiik, fó kréditu ba estudante sira ho funan kiik inklui fó kréditu ba ba joven sira-ne’ebé ke iha telentu halo múzika no prodús filme.
“Ita tenke promove múzika ho filme, ne’e ba internasionál la’ós de’it iha ra-laran. Ne’e governu tenke fasilita no promove joven sira-nia talentu tanba ita hakarak joven ne’e mak sai autór ba dezenvolvimentu,” líder jerasaun foun nee argumenta iha atividade polítika ne’e.
Prezidente Partidu Demokrátiku ne’e husu ba koordenadór munísipiu, postu no suku atu organiza militante no simpatizante sira vota ba PD.
Nune’e bele implemata programa prioridade hirak-ne’e, tanba PD nia vizaun no misaun hakarak luta ba Povu nia moris diak ho kondisaun ne’ebé dignu, sai sidadaun ida-ne’ebé fraternu, solidáriu no unidu.
Notísia relevante: PD prioritiza loke zona ekonomia livre iha fronteira
Jornalista: Sérgio da Cruz
Editór: Evaristo Soares Martins
