DILI, 31 maiu 2023 (TATOLI)—Embaixadora Timor-Leste ba Austrália, Inês Almeida, kuarta ne’e, simu ona desizaun hosi Governu Austrália kona-ba aseitasaun karimbu extensaun pasaporte eletróniku ne’ebé emite hosi Governu Timor-Leste.
“Ohin ho haksolok simu desizaun Governu Australia nian ba aseitasaun karimbu extensaun pasaporte eletróniku ne’ebé mak emite hosi Governu Timor-Leste ba situasaun ne’ebé konsidera espesiál,” Embaixadora hateten liuhosi nota ne’ebé Agência Tatoli asesu, kuarta ne’e.
Nia dehan, Austrália permite ona ba passaporte Timor-Leste ne’ebé mate, maibé bele hetan karimbu ba data extensaun tuir dekretu-lei Governu Timor-Leste númeru 23/2023, loron 19 abríl 2023.
Notísia relevante : Malázia no Indonézia aseita ho medida temporária utiliza pasaporte ho karimbu prorrogasaun
Diplmata dehan, Governu Austrália rekoñese karimbu extensaun pasaporte elektróniku ne’ebé emite hosi Governu Timor-Leste ba trabalhadór timor-oan sira ne’ebé mak atu halo viajen ba Austrália tuir misaun serbisu liuhosi programa Mobilidade Laborál Pasífiku Austrália (MLPA), ne’ebé permite atu empregadór akreditadu sira iha programa MLPA iha tempu badak halo rekrutamentu tan traballadór timor-oan.
“Timor-Leste hetan ona fama di’ak iha nia partisipasaun ba programa mobilidade laborál iha Austrália liuhosi traballadór ne’ebé mak serbisu iha setór agríkola, peska, ortikultura, ospitalidade no indústria prosesamentu na’an,” nia dehan.
Tuir diplomata ne’e, traballadór sira fó kontribuisaun boot tebes ba ekonomia rai rua nian.
“Rezolusaun aplikasaun karimbu extensaun pasaporte ne’ebé mate sei simu ho laran luak hosi empregadór akreditadu sira ne’ebé mak ansi loos atu lori tan traballadór timor-oan mai Austrália, tanba ita-nia traballadór sira hetan fama di’ak ona hanesan traballadór ne’ebé badinas, prontu atu apreende, repeitozu no amigavél,” nia tenik.
Embaixadora iha biban ne’e hato’o agradese ba Governu Austrália nia prontidaun atu buka hetan solusaun ba asuntu pasaporte mate, ne’ebé reflete relasaun viziñu di’ak entre Austrália no Timor-Leste.
Jornalista : Arminda Fonseca
Editora : Julia Chatarina
