VIQUEQUE, 09 juñu 2023 (TATOLI)–Governu liuhosi Ministériu Administrasaun Estatál (MAE), sesta ne’e, lansa suku foun tolu iha postu Administrativu Uatolari, munisípiu Viqueque.
Vise-Ministru Administrasaun Estatál, Lino de Jesus Torrezaun, hateten, proposta barak mak tama MAE atu loke suku foun iha Uatolari, maibé bainhira ekipa téknika sira halo analiza kle’an ba proposta, hosi suku Macadique, postu Uatolari atu hamosu tan suku rua.
“Objetivu atu loke aldeia, suku, postu no munisípiu hodi lori atendimentu besik ba povu no simu dezenvolvimentu lais ba povu. Nune’e ha’u mai lori VIII Governu nia naran, lansa suku Macadique ne’ebé uluk ida hahoris tan suku rua sai suku tolu. Atu hamosu suku foun ne’e, ekipa sira halo analiza proposta sira ne’e hodi labele mosu konflitu, tanba ne’e ita tenke haree didi’ak. Iha Uatolari parte Liaside no Iraler hakarak sai suku foun, nune’e ami halo analiza ba Iraler tama liu ba área Ulusu nian, ne’ebé parte rua ne’e labele sai suku. Nune’e mós iha ha’u-nia suku rasik propoin iha hotu, maibé la konsege loke suku “, Governante ne’e hateten liuhusu ninia diskursu, iha sede suku Macadique.
Notísia relevante : Proposta kriasaun suku foun 70-resin la aprova
Governante ne’e dehan, suku Macadique ho ninia populasaun númeru boot bele sai postu ida tanba populasaun postu Lacluta hamutuk 1.907 sai postu, maibé suku Macadique forma uluk ona ninia suku foun nune’e Governu foun mai bele halo kontinuasaun harii sede suku no fasilidade sira seluk.
“Karik ami maka sei iha MAE Uatolari no Uatucarbau, tuir planu postu rua ne’e hamutuk forma munisípiu ida tanba postu rua ne’e prienxe rekeziku sai munisípiu”. Nia hato’o.
Kona-ba desizaun hili suku bazeia ba lei suku númeru 9/2017 ne’ebé hatuur iha artigu 91 ne’ebé fó kompetensia ba Ministru Administrasaun Estatálatu deside.
Hosi establesementu suku foun ne’e MAE sei halo koodenasaun ho Sekretáriadu Tekniku Administrasaun Eleisaun (STAE) hodi halo fil fali resensiamentu kartaun eletóral ba abitante hosi suku tolu nian tanba naran suku muda hotu. Molok partisipa iha eleisaun suku, sei hili ninia xefe aldeia no xefe suku. Enkuantu dadaun ne’e Xefe Suku Afonso dos Reis ne’ebé sei kontinua tau-matan ba suku sira hodi hein eleisaun xefe suku realiza.
Iha fatin hanesan, Xefe suku Macadique, Afonso dos Reis, agradese ba VIII Governu ne’ebé deside ona proposta suku Macadique nian loke suku foun hodi aselera prosesu dezenvolvimentu ba abitante sira no bainhira hakbesik-ba atendimentu administrasaun suku sai fasil.
“Ha’u husu agradese ba membru ne’ebé deside ona proposta suku Macadique loke suku foun. Ha’u nafatin husu Governu foun mai bele deside tan suku tolu ne’e sai postu adiministrativu ketak ida,” nia hato’o.
Antes ne’e, suku Macadique ho ninia aldeia hamutuk 21 nune’e suku foun tolu maka hanesan Macadique de Cima ho aldeia 8 hamutuk totál uma-kain 420 no abitante totál hamutuk na’in-600, Macadique de Baixo ho aldeia hitu hamutuk totál uma-kain 400 no abitante hamutuk na’in-650. Suku rua ne’e ida lokaliza iha parte tasi no ida fali lokaliza iha foho Macadique Uaitame ho aldeia hamutuk neen, ho totál uma-kain 340 no abitante 899.
Serimónia lansamentu suku tolu iha postu Uatolari hetan partisipa hosi administradór munisípiu Viqueque, Brigadeiru FALINTIL-Forsa Defeza Timor Leste (F-FDTL), Sabika Besi Kulit, Polísia Nasionál Timor Leste (PNTL) Eskuadra Uatolari, ekipa MAE no abitante sira iha postu Uatolari.
Jornalista : Vitorino Lopes da Costa
Editora : Julia Chatarina
