DILI, 13 juñu 2023 (TATOLI)—Reprezentante Vátikanu iha Timor-Leste, Núnsiu Apostóliku, Monseñor Marco Sprizzi, tersa ne’e, hala’o audiénsia no entrega karta agradesimentu hosi Papa Francisco ba Prezidente Parlamentu Nasionál, Aniceto Longuinhos Guterres Lopes, iha Parlamentu Nasionál.
“Nia mai husu audénsia ida ikus no aumezmu tempu entrega karta Santo Padre nian, karta agradesimentu Santo Padre ba kolaborasaun Parlamentu Nasionál nian durante ha’u-nia prezidénsia tinan tolu resin ho igreja katólika, nune’e mós ho reprezentasaun Nunsiatura iha Timor-Leste,” Prezidente PN, Aniceto Longuinhos Guterres Lopes, hateten ba jornalista sira hafoin ramata audiénsia.
Nia hatutan, entrega karta ne’e no aproveita mós hanesan hato’o liafuan ikus ba PN tanba mandatu lejislatura dalima sura de’it loron balun tan termina.
Biban hanesan, Prezidente Parlamentu Nasionál, Aniceto Longuinhos Guterres Lopes, hato’o liafuan despedida ba igreja katólika no Nunsiatura ne’ebé durante ne’e iha kolaborasaun direta serbisu hamutuk ba interrese sarani no povu Timor-Leste nian ne’ebé maiória katólika ne’ebé durante ne’e la’o di’ak.
“Ami troka liafuan sira agradesimentu hanesan luiliu ha’u, tanba hanesan ida-ne’e audiénsia ikus hasoru malu ba dala ikus hanesan halo despedida mós xefe misaun liu-liu embaixadór rezidente iha Dili,” nia hateten.
Núnsiu Apostóliku, Monseñor Marco Sprizzi, hateten ohin hanesan vizita mai iha Prezidente Parlamentu Nasionál iha finál lejislatura, hodi entrega karta agradesimentu apresu hosi Santo Padre Papa, pesoalmente responde hodi dirije karta ne’e.
Iha okaziaun ne’e, nia agradese kolobarasaun hotu entre PN ho Nunsiatura Apostólika Santa Sé Vátikanu importante ba moris di’ak sosiedade ne’ebé realiza inisitiva ka lei importante ba vistu misionáriu ne’ebé mai halo serbisu ba povu espesiál ba povu vunerabel sira.
Nune’e mós, PN halo adosaun dokumentu kona-ba fraternidade umana Santo Padre hamutuk ho autoridade másimu islámiku musulmana ne’ebé adota sai hanesan dokumentu nasionál, ida ne’e méritu bo’ot ida ba iha Parlamentu ida ne’e ho inisiativa Prezidente Repúblika, maibé laiha kolaborasaun ho deputadu no bankada parlamentár inklui meza PN labele realiza, tamba ne’e méritu bo’ot no istóriku tebes iha PN Timor-Leste.
Nia dehan, agradese ba delegasaun Parlamentu ba iha Roma kompostu hosi Vise Prezidente PN na’in-rua partisipa iha serimónia konsistóriu kardeál Dom Virgílio Arsebispu Dili, ida-ne’e sinál ida envolvimentu Parlamentu iha akontesimentu igreja ne’ebé partisipa reprezenta povu maiória timorense.
Agradese mós inagura edifísiu foun Nunsiatura besik iha igreja Motael nia sorin, Prezidente Parlamentu no kauze Deputadu hotu partisipa.
Nunsiátura sinál carinho do Papa ba Timor-Leste, no mós organiza vizita Papa mai iha ne’e, maibé felismente ho kauza situasaun idade no kondisaun jerál saúde Papa la konsege realiza no mós ho kauze COVID-19.
Nune’e, Núnsiu Apostóliku, Monseñor Marco Sprizzi, apresia tebes serbisu segundu órgaun soberania Parlamentu Nasionál no Prezidente PN rasik, no Santa Se Vátikanu sempre partilla ho Estadu no nasaun ba povu, entaun ba kualkér PN ka maiória sempre prontu kolabora suporta iha sorin hanesan mós ho reprezentante povu, nune’e sempre kolobora ho lejislatura foun mai.
Jornalista : Nelson de Sousa
Editór : Cancio Ximenes
