DILI, 16 juñu 2023 (TATOLI) – Komandu Polísia Nasionál Timor-Leste (PNTL), ofisiálemente despede membru 158 ba vida sivíl, Serimónia despedida prezide direta hosi Komandante Jerál PNTL, Komisáriu Jerál Herique da Costa no hetan akompañamentu hosi Segundu Komandante Jerál PNTL Komisáriu Pedro Belo.
Prezidente Komisaun Organizadora ba serimónia despedida, Superentidente Xefe Arquimino Ramos, atividade serimónia ne’e halo tanba bazea ba lei orgánika PNTL foun no estatutu pesoál ne’ebé aprova iha setembru 2022.
“Iha estatutu pesoál PNTL nian, kuandu tama ona ba idade 60 ne’e obrigatoriamente tenke reforma, iha estatutu pesoál PNTL iha ne’eba la hateten membru idak idak tenke husu reforma, maibé idade 60 obrigariamente tenke tama ba reforma”, Arquimino Ramos hateten iha Sentru Formasaun Polísia (CFP, siglpa portugés) Comoro, sesta ne’e.
Tuir estatutu pessoál PNTL lei númeru 69/2022, 28 setembru iha artigu 128, membru ne’ebé tama ba reforma ka aprezentasaun ou pasajen mak sira ne’ebé atinje ona idade 60. Aleinde ne’e mós kuandu membru PNTL ida mak fízika no piskolojikamente nia labele halo ona funsaun hanesan membru PNTL, entaun ema sira ne’e bele tama ba reforma.
Nune’e mós iha artigu 129 hosi estatututu pesoál PNTL fó dalan estandarte iha loron 30 fulan abríl, Komandu Administrasaun tenke submete lista ba Gabinete Komandante Jerál PNTL atu halo publikasaun ba Jornál Repúblika.
Arquimno hateten, ho lei estatutu pesoál PNTL maka hahú 14 novembru 2022, Departementu Administrasaun Komandu Jerál PNTL manda lista ba Gabinete Komandante Jerál. Hosi ne’ebá gabinete enkamiña ba Gabinete Ministru Interior hodi informa situsaun kona-ba membru sira ne’ebé tama ba reforma.
Iha loron 22 marsu, ofísiu ida hosi Gabinete Ministri Interiór husu atu kompleta dadus sira kona-ba saláriu, postu kada membru ne’ebé tama ba reforma, inklui saláriu désimu teresiru atu manda ba Institutu Seguransa Sosiál (INSS) atu halo kontajen ba membru PNTL ne’ebé reforma atu hetan diretu hira.
“Entaun hahú hosi ne’e, Komandu Adminitrasaun hahú koordena ona ho membru PNTL ne’ebé atu pasa ba reforma hodi hahú trata sira-nia dokumentu iha fulan abril, ofisiu ida mai tán hosi Gabinete Ministériu Interiór hateten ba Komandante Jerál durante loron 10 tenke aprezenta lista ne’e públika ba Jornál Repúblika”, Prezidente Komisaun Organizadora dehan.
Tanba ne’e, mak iha 5 maiu halo publikasaun iha Jornál Repúblika, membru PNTL nain 158 ne’ebé tama ona ba pasajen reforma.
Nia dehan, iha semana kotuk iha enkotru ho Dirtór Institutu Nasionál Seguransa Sosiál (INSS) dokumentu ba membru reformadu sira los hotu ona no bainhira membru PNTL 158 pasa ba reforma no kuandu PNTL hapara sira-nia saláriu iha 1 jullu membru PNTL reformadu sira INSS mak sei halo pagamentu.
“Sira ne’ebé reforma ho diviza superintendente xefe antes simu saláriu $500 baihira ba reforma sira sei simu $500 hosi sira nia saláriu antes ne’e no ha’u hanoin iha saláriu ne’e garantia ona sira bele moris no refleta ba situsaun Timor-Leste”, nia katak.
Iha fatin hanesan, Komandante Jerál PNTL, Komisáriu Jerál Herique da Costa hateten, reforma nudar prosesu ida ne’ebé sempre akontese iha instituisaun, PNTL hahú ona ho reforma no ida ne’e hatudu katak laiha ema ida mak permanente iha institusaun ida.
“Imi-nia dedikasaun durante tinan 20 liu, imi halo buat barak ne’ebé kontribui ba dezenvolvimentu, instituisaun ida ne’e, ami sei la haluhan ida ne’e. Instituisaun ne’e nia di’ak konta mós ho ita bo’ot sira-nia apoiu”, nia dehan.
Komandante Jerál PNTL ne’e hateten, maske membru sira ne’e hahú hosi loron 1 fuluan jullu 2023, la’os ona membru PNTL, maibé PNTL nian odamatan nakloke baihira membru reformadu sira presiza.
Komisáriu Jerál Herique da Costa husu ba memmbru PNT reformadu sira uza osan reforma PNTL ne’e ho di’ak, investe ba oan sira nia eskola no halo uma ba família atu família kontente.
Reprezentante Primeiru Ministru Prezidénsia Konsellu Ministru Fidelis Leite Magalhães, hetan previléjiu bo’ot bele partisipa iha serimónia despedida membru PNTL ne’ebé pasa ba reforma.
Nia dehan, refoma ne’e nudar jestu ida ne’ebé institusaun ida halo kuandu pessoál ida servisu institusaun to’o ona ida atu refoma tenke ba duni.
“Ema ida labele hela permentene iha instituisaun ida to’o idade 60, tenke refoma hodi ita goza ita-nia idade, tanba ne’e Governu halo lei refoma obrigatóriu atu fó dalan ba ema kuandu atinje idade 60 tenke refoma”, governante dehan.
Iha biban ne’e, reprezentante membru PNTL reformadu, Inspetór Polísia, Tomas Aquino hateten, reforma ne’e normál maibé onda boot mai ami, la’os duni sai maibé PNTL konsidera liuhosi serim´nia despedida ne’ebé ho dignu.
“Reforma ne’e normál, maibé onda bo’ot ba ami mak la’os duni sai ami hosi ne’e maibé halo ohin komandu halo serimónia ida ho digñu despede ami”, nia dehan.
Nia husu mós ba Komandu PNTL atu halo rekrutamentu ba membru PNTL foun hodi troka hirak ne’ebé reforma ona atu servisu di’ak liután vida instituisaun nasaun no povu.
Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek kongratula membru PNTL 158 ne’ebé pasa ona ba idade reforma.
Jornalista: Natalino Costa
Editór : Zezito Silva
