DILI, 22 juñu 2023 (TATOLI)—Prezidente Parlamentu Nasionál sesante, Aniceto Longuinhos Guterres Lopes, dezeja no susesu Deputadu foun na’in-65 iha lejislatura daneen hodi reprezenta povu tomak iha Parlamentu Nasionál.
Notísia Relevante: Ohin, PN realiza reuniaun plenária dahuluk ba lejislatura daneen
“Dezeja tebe-tebes lideransa futuru Parlamentu Nasional no deputadu sira lori órgaun soberania ne’e ho dignu, solidu no íntegru iha nia funsaun nu’udar reprezentante povu tomak,” Prezidente PN sesante hateten liuhosi reuniaun plenária dahuluk lejislatura daneen iha sala plenária PN, kinta ne’e.
Nia hatutan, mandatu ida remata hodi hahú mandatu seluk lejislatura ida termina atu inísia lejislatura ida tuir mai hodi fó kontinuidade vida instituisionál no podér konstituisionál órgaun soberania ne’ebé reprezenta povu tomak, dezeja susesu ba deputadu lejislatura daneen no solidu, firmeza to’o mandatu ramata 2028.
Orden konstitusionál no lei sira mak fo dalan liuhosi eleisaun demokratika hodi lori deputadu sira mai hafutar-aan iha fatin ida-ne’e no rohan to’o iha ne’e, substituisaun periodika tinan lima-lima fó biban ba sidadaun sira-ne’ebé hetan konfiansa hosi nia partidu atu asume likus poder konstitusionál ne’ebé atribui ba Parlamentu Nasional hodi rona, buka hatene no diskute asuntu sira-ne’ebe nakfilak ba lei no desizaun politika hodi serbi interrese Estadu, fatin de honra ida-ne’e rejista ona lejislatura dalimak no PrezidenteParlamentu ba dala-ualu ona.
“Ita lubuk ida iha ne’e no sira-ne’ebe la hamutuk ho ita oras ne’e, sai autór ba dinamika iha perkursu naruk ida-ne’e no kontinua dinamiza funsionamentu no kompeténsia orgaun soberania ne’e ho lejislatura ne’ebe agora hahu no seluk iha future,” nia hateten.
Nia dehan, iha eleisaun parlamentar 21 maiu liuba, povu konfirma dala ida tan nia konfiansa ba partidu lima hodi hatutan konfiansa ne’e ba nia militante, tuir reprezentatividade demokrátika, hodi artikula povu nia aspirasaun, nesesidade no preokupasaun.
“Ha’u-nia parabéns no dezeju susesu ba deputadu hotu-hotu iha VI lejislatura ida-ne’e, no nia solides no firmeza too mandatu ne’e rámata iha tinan 2028.” nia hateten.
Nia hakarak manifesta apresiasaun no agradesimentu ba kontribuisaun no partisipasaun husi parte hotu-hotu iha perkursu dezáfiadora durante tinan tolu fulan ida ne’e iha mandatu lejislatura dalimak.
“Apresia tebes parte hotu-hotu nia kolaborasaun, dedikasaun no kontribuisaun iha forma oioin, jestu kamaradajen, enkorajamentu no solidariedade. Agradese ho laran ba distintu deputadu sira nia hanoin krítika no sujestaun ne’ebé manifesta liuhosi sesaun plenária, komisaun espesializada sira, bankada Parlamentar no Konsellu Administrasaun ne’ebé kontribui ba produtividade lejilstura dalimak,” nia dehan.
Prezidente PN sesante ne’e mós, agradese ba eis Prezidente Repúblika, Francisco Guterres ‘Lú Olo’ no atual Prezidente Repúblika, José Ramos Horta nia kolaborasaun di’ak, ba VIII Governu Konstitusionál ein jerál no partikularmente Primeiru-Ministru, Taur Matan Ruak nia komunikasaun, kolaborasaun no relasionamentu ne’ebé forte ho Parlamentu Nasionál.
“Ha’u-nia agradesimentu ba Vise-Prezidente no membru meza sira, ba bankada plataforma no bankada Parlamentar hotu-hotu, ba funsionáriu, pesoal tekniku, asesór sira, pesoál seguransa no pesoál medéku sira, media no sosiedade sivil nia dedikasaun no kolaborasaun,” nia hateten.
Prezidente PN ne’e, hato’o mós agradesimentu boot ba igreja katólika liuhosi Arsebispu Arkidioseze Dom Virgílio Kardeál do, ba instiuisaun fiar nian sira seluk no ba parseiru dezenvolvimentu, no ba povu tomak.
Jornalista : Nelson de Sousa
Editór : Cancio Ximenes
