DILI, 17 jullu 2023 (TATOLI)–Banku Dezenvolvimentu Aziátiku (ADB, sigla portugés) iha sujestaun rua ba Governu, katak tenke kria kondisaun di’ak ba investimentu privadu no kapasitasaun ba rekursu umanu.
“Dezenvolvimentu ekonomia iha Timor-Leste atu la’o di’ak tenke kria kondisaun ba investimentu privadu no tenke dezenvolve kapasidade ema-nian nune’e rua ne’e la’o hanesan,” Diretora ADB iha Timor-Leste, Stefania Dina, hateten, hafoin hasoru malu ho Prezidente Repúblika, José Ramos Horta, iha Palásiu Prezidensiál, Bairru Pité, segunda ne’e.
Notísia relevante : PR Horta kondekora reprezentante ADB ho medalla ordem Timor-Leste
Stefania Dina sujere mós ba Governu Timor-Leste katak tenke haree ba diversifikasaun ekonomia.
“Daudaun ita depende liu ba despeza públika, entaun presiza kria kondisaun ba setór privadu hodi mellora ekonomia rai-laran no investe iha setór produtivu seluk mós importante hodi dezenvolve ekonomia, hanesan investimentu iha área agrikultura,” nia akresenta.
Governu Timor-Leste foti empréstimu millaun $615 hosi ADB desde tinan 2012 to’o agora, ne’ebé orsamentu sira ne’e foka liu ba infraestrutura hanesan estrada, bee-moos, no eletrisidade.
Diretora dehan, ADB fó empréstimu ba Governu Timor-Leste ho prinsípiu katak hosi Governu nia investimentu sira-ne’e bele hadi’a fali ekonomia nasaun hodi fó vantajen ba Governu selu fali empréstimu sira.
Jornalista : Antónia Gusmão
Editora : Julia Chatarina
