DILI, 20 jullu 2023 (TATOLI)–Diretór Kompañia Bobolait Unipesoál, Lda, Carlito Salvador Pereira, hateten konstrusaun Monumentu Masakre 12 Novembru Santa Cruz tarde tanba fallansu tékniku.
Notísia Relevante: Monumentu 12 Novembru sei sai roteiru istóriku no turístiku
“Ami hetan autorizasaun hosi MAKLM no bazeia ba dezenu ne’ebé iha, no ami la halo tuir ami-nia hakarak. Maibé kona-ba progresu, ha’u mós seidauk hatene detallu kona-ba ida-ne’e, no konstrusaun ida-ne’e tarde tanba fallansu tékniku maibé projetu kontinua la’o hela,” Carlito Salvador Pereira hateten ba jornalista sira, iha semitériu Santa Cruz, Dili, kinta ne’e.
Husu kona-ba finalizasaun konstrusaun, nia hatán, nia parte seidauk preparadu no tinan ne’e seidauk bele finaliza tanba buat hotu-hotu bazeia ba dezeñu.
“Ami tuir de’it orden hosi dono do projeto, maibé kona-ba osan di’ak hela, só problema tékniku de’it,” nia hateten
Konstrusaun Monumentu 12 Novembru ne’e, daudaun ne’e la’o hela tanba moru ba semiteriu ne’e hotu ona no hein atu pinta de’it, maibé ba dalan sira sei iha prosesu nia-laran.
“Moru kuaze 80% remata no hein pinta de’it. Ami atu pinta maibé orsida foer fali entaun husik ne’e depois hotu mak pinta dala ida. Projetu ne’e la’o hela maibé la’o mak neineik hela,” nia dehan.
Orsamentu ne’ebé aloka ba konstrusaun Memorial Santa Cruz ka Monumentu Santa Cruz ne’e hamutuk $1.385.389.88.
Konstrusaun refere hahú klnstrui iha 22 setembru 2021 to’o 22 setembru 2022 maibé seidauk konklui, depoimentu Governu Governu liuhosi Ministériu Asuntu Kombatente Libertasaun Nasionál (MAKLM) prolonga tinan 2023.
Iha fatin hanesan, Sekretáriu Estadu Asuntu Toponímia no Organizasaun Urbana, Germano Santa Brites, orienta kompañia Bobolite atu hamoos no hadi’a tiha kedas dalan ba semitériu Santa Cruz nian inklui letra ne’ebé monu ona.
“Materiál konstrusaun ba monumentu masakre 12 novembru nian tenke hatama ba laran, didin tenke hadi’a halo di’ak. Ohin ho aban tenke hotu, aban sei mai fali haree, ha’u hakarak letra tenke prontu uluk ona. Tanba fulan oin Primeiru-Ministru Portugal sei mai visita ita-nia rain. Tanba ne’e, ohin, ami prezensa iha semitériu Santa Cruz no Becusse hodi halo preparasaun no fatin tenke moos,’ nia hateten.
Aleinde ne’e mós husu kompañia Bobolait atu aprezenta dezeñu hodi haree, tanba fatin ne’e área munisípiu Dili nian.
Iha tempu badak, Autoridade Munisípiu Dili sei enkontru ho dono do projetu no kompañia Bobolait Unipesiál, Lda, hodi ko’alia kona-ba fatin no konstrusaun ne’e.
Notísia Relevante: Konstrusaun monumentu 12 Novembru posivél bele suspende tanba la’o lentu
Jornalista : Osória Marques
EDitór : Cancio Ximenes
