OÉ-CUSSE, 25 jullu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Saúde, daudaun ne’e koordena ona autoridade sira iha propinsia Nusa Tenggara Timur (NTT) liu-liu distritu Timur Tenggah Utara (TTU) no distritu Kupang hodi realiza enkontru promosaun integrada atu prevene moras hada’et sira iha liña fronteira.
Notísia relevante: Aniversáriu sidade Kefamenanu, nu’udar opurtunidade hametin kooperasaun entre RAEOA-TTU
Sekretáriu Rejionál ba Asuntu Saúde, Manuel da Costa, hateten, objetivu halo koordenasaun ne’e ne’e parte rua, entre TTU-Kupang no RAEOA atu-bele halo programa promosaun integradu hodi hamenus moras hada’et sira, liuliu iha liña fronteira.
“Semana kotuk, ita-nia ekipa ba halo ona enkontru koordenasaun ho parte Indonézia, kabupaten TTU no Kupang, objetivu ekipa ba ne’e atu koordena kona-bá programa ne’ebé atu halo, entre rai rua liu-liu iha suku fronteira sira, atu halo penguluhan ka halo promosaun integradu ba moras hada’e sira, hanesan HIV-AIDS, lepra, TBC no mós programa malaria nian rasik,” Manuel da Costa ba Tatoli iha Oé-Cusse, tersa ne’e.
Nia informa, iha loron domingo 30 jullu semana ne’e, ekipa tékniku sira sei dezloka-tán hamutuk ho servisu nivél sentrál, komposta hosi Ministériu Saúde (MS), fundu globál no RAEOA rasik,
“Sira ba atu kontinua halo tán enkontru koordenasaun ho Dinas Kesehatan TTU no Kupang, atu trasa planu, para halo programa sira, enkontru iha nivél fronteira, tanba sei realiza iha fronteira WINI, Napan, Oépoli, Suinbaki liu-liu iha área fronteira, tanba enkontru ne’e sei halo kada suku, ne’ebé tuir planu sei realiza iha agostu nia laran,” nia afima.
Nia aprofunda tán katak, meiu ne’e nu’udar kontribuisaun no preparasaun ba daudaun ne’e Timor-Leste mós sai ona membru observadór iha ASEAN.
“Entaun ida-ne’e mós ita tenke prepara, liu-liu moras hada’et sira, komunidade parte rua tenki prevene, iha sorin ne’ebá mós tenki livre ita-nia mós tenki livre, tan ne’e mak parte rua persiza tur hamutuk atu halo promosaun ida iha nivél sira iha fronteira,” nia katak.
Notísia relevante: RAEOA-NTT hahú diskute harii investimentu iha área turizmu
Jornalista: Abílio Elo Nini
Editór: Evaristo Soares Martins
