COVALIMA, 06 setembru 2023 (TATOLI)—Administradór munisípiu Covalima, Francisco de Andrade, hateten Administrasaun Munisípiu Covalima halo dezeñu no Planta no Kadernu Enkargu (Boq) atu harii santuáriu Padre Hilario Madeira, Francisco Soares no Tarsisus Dewanto iha antiga Igreja Ave Maria Suai ne’e finaliza ona.
Notísia Relevante: Masakre Suai 1999: Padre Hilario-Francisco-Dewanto hakoi iha tasi ibun Metamau
“Ita sei harii padre Hilario, Francisco no Dewanto nia santuáriu iha antiga igreja Ave Maria Suai. Durante ne’e, veteranu sekretáriu zona no suku sira enkontru hodi fó servisu ba Administrasaun, ami mak halo dezeñu ka halo Planta no Kadernu Enkargu (boQ santuáriu padre na’in-tolu nian finaliza ona,” Francisco de Andrade hateten ba jornalista-sira iha resintu Monumentu Masakre Setembru Negro 1999, kuarta ne’e.
Tuir lolós, nia dehan, bazeia ba rezultadu enkontru ikus iha fulan-jullu ne’ebé autoridade hein komisaun organizadora atu hasai konvite, nune’e iha fulan-agostu atu tau kontribuisaun hahú hosi veteranu, funsionáriu públiku no família vítima sira maibé la konsege.
“Ami halo ona kalkulasaun ba orsamentu ne’ebé atu halo kontribuisaun ne’ebé totál orsamentu kuaze rihun $100. Tanba ne’e, komisaun tenke hasai lalais konvite, nune’e ita bele realiza ona ita-nia kontribuisaun,” nia dehan.
Autoridade Covalima husu ba diretór munisipál sira, komandante PNTL, eskuadra ho administradór postu administrativu hotu atu sai na’in, nune’e ema hotu tenke fó nia konstribuisaun tanba sira-nia mate mak ita-nia moris.
Notísia Relevante: Setembru Negro, mate-isin butuk iha igreja oin hanesan foho oan ida
Istória pasada padre na’in-tolu hamutuk ho sarani sira ne’ebé mate iha Igreja Ave Maria Suai ne’e la’os uitoan maibé mate barak kuaze ema 200-resin ne’e, mate tanba hosi asaun brutalizmu milisia pro-Indonézia Mahidi (Mati Hidup dengan Indonesia) no Laksaur (Laksanakan Sapu Rata) sira-nian ne’e mak hamosu Masakre Setembro Negro 1999.
Ho nune’e, nia hateten, preparasaun ba komemorasaun Masakre Setembro Negro ba dala-25 (06 setembru 1999-06 setembru 2024) tinan oin ne’e, Covalima-oan hotu tenke fó nia kontribuisaun hafoin entrega ba padre pároku atu rai iha banku.
“Maske ita seidauk foti desizaun atu deside kontribuisaun kada ema ida hira maibé atu harii santuáriu iha padre na’in-tolu hamutuk ho sarani sira dahuluk presiza ita-nia kontribuisaun,” nia hateten.
Prezidente komisaun Organizadora, Domingos Oliveira “Foti Riba”, reforsa preparasaun komemorasaun masakre setembru negro 1999 ba tina oin ne’e, atu harii padre na’in-tolu nia santuáriu ne’e presiza ema hotu-hotu nia kontribuisaun.
“Preparasaun tinan 25 komemora Masakre Setembru Negro 1999, ha’u fó hanoin ba povu Covalima liuliu funsionáriu públiku, PNTL no F-FDTL, hanesan Suai-oan iha fatin ne’ebé de’it, atu fó nia kontribuisaun hodi harii santuáriu padre na’in-tolu iha aredór igreja antiga Ave Maria Suai,” nia dehan.
Covalima-oan tenke lolo-liman hamutuk hodi halo preparasaun ba komemorasaun Masakre Setembru Negro 1999 ba dala-25, atu harii padre na’in-tolu nia santuáriu hamutuk sarani sira-ne’ebé mate, tanba sira-nia mate mak ohin loron ema hotu bele goza ukun rasik aan ne’e.
Preparasaun atu hari padre na’in-tolu nia santuáriu maske dezeñu preparadu ona maibé presiza orsamentu, nune’e covalima-oan presiza fó nia konstribuisaun.
Notísia Relevante: Covalima-oan planeia harii Padre Hilario-Francisco-Dewanto nia estátua iha Covalima
Jornalista : Celestina Teles
Editór : Cancio Ximenes
