DILI,11 setembru 2023 (TATOLI) — Diretór Klíniku Bairo Pite, Inacio do Santos, informa durante fulan agostu, Klínika Bairo Pite rejista moras kulit hamutuk 490.
“Durante fulan agostu moras ne’ebé ita rejista aas liu mak moras kulit, hamuutk 490, tuir mak infesaun Vias Respiratóriu Aguda hamutuk 338”, Inacio do Santos informa iha nia kna’ar fatin, ohin.
Inacio dehan, moras kulit ne’e afeta ba labarik kiik no mós ema bo’ot sira, entaun ida ne’e mak sira mai halo tratamentu iha ne’e.
“Moras kulit ne’e akontese tanba bee ne’ebé mak ita uza banhira la moos, ida ne’e bele akontese moras ida ne’e”, nia esplika.
Nia hateten, bainhira pasiente sira mai halo tratamentu iha ne’e, profisionál saúde sira fó atendimentu ne’ebé di’ak to’o rekopera mak hafoin fila ba uma.
Aleinde ne’e, KBP halo tratamentu ba pasiente dentaria hamutuk 202 tanba iha fasilidade ne’ebé mak natoon atu halo atendimentu ba populasaun sira ne’ebé mak ho problema nehan.
“Difikuldade ba ami mak ami la iha materiál sira ne’ebé amk atu fornese ba pasiente sira hanesan atu tambal nehan ita seidauk iha, ba fokit nehan mós ita la iha anasténsia lokál para bele fokit nehan tanba Governu la fornese ho ida ne’e, ami husu populasaun sira atu kontribui”, nia kestiona.
Nia relata, fasilidade ba dentaria, daudaun ne’e iha progressu tebes, tanba ekipamentu foun ne’ebé mak KBP sosa rasik atu bele mellora liután atendimentu ba oin.
“Ami-nia fasilidade ba dentaria, ita boot sira haree agora daudaun iha progressu tanba ami-nia ekipamentu foun sira ne’e ami kompras rasik, entaun ami koko atu mellora nafatin ba oin”, nia hateten.
Fulan agostu, KBP rejista pasiente ne’ebé konsulta hamutuk 2000-resin, husi ne’e mai husi moras ISPA, moras kulit,má nutrisaun, HIV SIDA , asidente trafegu, inan isin rua no tuberkoloze.
Jornalista : Felicidade Ximenes
Editór : Zezito Silva
