DILI, 28 setembru 2023 (TATOLI) – Boxista lendáriu, Manny Pacquiao, husi Filipina, to’o ona Timor-Leste, ho aviaun komersiál Citilink iha oras tuku 12:07 iha Aeroportu Internasionál Prezidente Nicolau Lobato, ohin.
Prezensa boxista Filipino ne’e simu direta husi Prezidente Konfederasaun Desportiva Timor-Leste (CDTL, sigla portugés), Macario Sanches, reprezenta Ministru Juventude Desportu Arte no Kultura (MJDAK) no tara Tais husi Kay Olok, reprezenta joven Timor-Leste, inklui ekipa MJDAK
Hafoin to’o, Pacquiao deskansa durante minutu 15 iha sala VIP aeroportu nian hafoin arranka kedan ho karreta VIP ho númeru matrikula 05:138 G hodi hakat liubá fatin deskansa iha Hotel Timor Plaza.
Komunidade Mateus Guterres ne’ebé asiste direta iha aeroportu, kontente tanba bele haree direta Boxista internasionál ne’e.
“Sente kontente tanba bele haree direta Manny Pacquiao tanba durante ne’e haree de’it hosi telivizaun, maibé agora haree direta, maske la kaer-liman ho nia mas haree direta ne’e mós los ona”, Mateus dehan ba Agência TATOLI, iha Aeroportu, kinta ne’e.
Tuir oráriu ne’ebé iha, lorokraik ne’e, Pacquiao sei vizita ba Embaxada Filipina iha Timor-Leste hodi hasoru malu ho Filipino sira iha Timor-Leste.
Pacquiao hetan seguransa másimu hosi Polisia Nasionál Timor-Leste (PNTL) hosi Unidade Espesiál Polisia (UEP).
Durante iha Timor-Leste, tuir ajenda, Boxista lendáriu, Manny Pacquiao “Pac-Man”, sei hasoru malu ho autoridade timoroan sira, vizita klube boxe sira hanesan El matador, Clubu Boxe Benfica, Clubu Oriental Boxing, Dili Boxing Club, inklui atividade importante relevante sira seluk, molok fila fali ba Filipina.
Notísia relevante : Manny Pacquiao sei to’o TL ho Aviaun Citilink
Manny Pacquiao vizita TL iha 28 setembru 2023
Lian Klube Boxe TL ba vizita Pacquiao
Délio uza Manny Pacquiao sai referénsia iha SEA Games
Jornalista: Hortencio Sanchez
Editór : Zezito Silva
