DILI, 22 setembru 2023 (TATOLI) – Ministériu Juventude Desportu Arte no Kultura (MJDAK) liuhosi Komisaun Nasionál Desportu (KND), halo ona preparasaun masima hodi simu vizita Boxista Internasionál Manny Pacquiao ne’ebé sei vizita Timor-Leste iha 28 setembru 2023.
“Boxista Manny Pacquiao sei vizitaTimor-Leste iha loron 28 fulan setembru 2023”, hatete iha komunikadu ne’ebé Agência TATOLI asesu hosi Media Gabinete MJDAK, ohin.
Estadia iha Timor-Leste, Manny Pacquiao sei hasoru alta entidade sira hanesan Prezidente Republika, Primeiru-Ministru no mós Prezidente Parlamentu Nasionál.
Boxista Filipinu ne’e sei vizita fatin treinamentu Boxe Timor-Leste, hanesan Benfika Boxe Club, El-Matador Boxe Club, Dili Boxe Club no mós Oriental Boxe Club.
Federasaun Boxe Amadora Timor-Leste (FBATL) sei koopera hamutuk ho Konfederasaun Desportiva Timor-Leste (CDTL-sigla portugés), hodi organiza di’ak liután vizita atleta legendáriu ne’e bele la’o susesu.
Manny Pacquiao sei husik hela Dili no fila ba Filipina iha 30 setembru 2023.
Jornalista: Hortencio Sanchez
Editór : Zezito Silva
