DILI, 25 setembru 2023 (TATOLI) – Prezidente Klube Boxe El-Matadór Abilio Orlando dos Santos, dehan lejendáriu Boxista Manny Pacquiao nia vizita mai Timor-Leste (TL) iha 28 setembru, orgullozu no motivadu liután ba Boxista timoroan sira hodi mellora liután kapasidade jogu.
“Ita sente kontente tebes tanba ita sei hetan vizita espesiál ida hosi Boxista Manny Pacquiao, ida-ne’e orgullu ida ba Timor-Leste, nia mai ne’e atu motiva liután ita-nia Boxista sira oinsa bele iha nafatin espiritu atu hametin sira-nia talentu hanesan Boxista”, Abilio dehan ba Agência TATOLI iha Benfica Colmera, segunda ne’e.
Abilio refere, Klube El-Matador prepara ona proposta balun atu hato’o ba Manny Pacquiao atu bele tulun Boxista timoroan sira iha futuru.
“Ita prepara ona planu balun atu hato’o ba nia, kona-ba oinsa atu tulun ita iha treinamentu ba ita-nia atleta sira no husu mós nia atu bele apoiu ita-nia atleta sira ho meiu saida de’it atu promove ita-nia nia atleta sira ba oin”, nia adianta.
Iha fatin hanesan, responsável másimu ba Klube Boxe Benfica, Vitór Ramos, sente kontente tanba Manny Pacquiao sei vizita Benfica.
“Ami sente orgullu tebes tanba Manny Pacquiao sei mai vizita Timor-Leste, ita haree iha Indonézia, sira rasik husu atu mai vizita sira maibé nia la ba, maibé ita-nia mak hakarak mai vizita ne’e, orgullu ida ba ita, nia mai mós sei mai vizita ami-nia fatin ne’e, ami kontente los”, Vitór revala.
Nia orgullozu tanba Pacquiao sei hakat ba Benfica Dili, El-Matadór no Dili Boxe no hanesan previlejiu ba Boxista Timor-Leste.
“Mai vizita ami Boxe sira-nia fatin, ida ne’e previlejiu ida ba ami, ami bele iha espasu atu bele hasai foto hamutuk ho nia”, nia katak.
Nune’e mós, Treinadór Dili Boxe, Eduardo Manuel Guterres de Araujo, sei prepara atividade lubuk ida hodi simu Boxista Filipino ne’e.
“Ami fó obrigadu barak ba Manny Pacquiao tanba hakarak vizita ami-nia fatin, ami prepara atividade lubuk ida hodi simu nia, atividade mak hanesan tara tais ba nia”, treinadór dehan.
Aleinde ne’e, Treinadór Klube Becora Boxe Casa Grande, Alex Barreto orgullu ho vizita Manny Pacquiao maske vizita de’it klube balun maibé importante liu mak vizita Timor-Leste.
“Maske nia mai vizita de’it klube tolu nia fatin maibé ami orgullu los tanba hanesan Boxista Lejendáriu ida bele mai vizita ita-nia nasaun, fiar katak nia vizita ne’e bele motiva mai ami Boxista hotu iha nasaun ne’e”, Alex hatutan.
Tuir oráriu ne’ebé iha, Manny Pacquiao vizita Benfica Boxe menutu 30, El-Matador menutu 30 no Dili Boxe menutu 30.
Notísia relevante : Manny Pacquiao sei to’o TL ho Aviaun Citilink
Manny Pacquiao vizita TL iha 28 setembru 2023
Délio uza Manny Pacquiao sai referénsia iha SEA Games
Jornalista: Hortencio Sanchez
Editór : Zezito Silva
