DILI, 25 setembru 2023 (TATOLI) – Prezidente Komisaun Organizadora (KO) João Rodriges, informa Boxista Internasionál Manny Pacquiao sei to’o Timor-Leste iha 28 setembru ho aviaun Citilink iha tuku 12:20.
Pacquiao sei simu direta hosi Ministru Juventude Desportu Arte no Kultura(MJDAK) no Sekretáriu Estadu Arte no Kultura (SEAK) iha Aeroportu internasionál Prezidente Nicolau Lobato no sei simu ho dansa tradisionál ne’ebé prepara hosi SEAK.
Tuir oráriu, Pacquiao to’o iha sala VIP, sei viajen no hetan eskoltu metin hosi Polísia Nasionál Timor-Leste (PNTL) hodi ba deskansa iha Plaza Hotel iha Timor Plaza Dili, la iha konvoiu hosi komunidade Timor-Leste.
Iha parte loraik tuku 15:00-16:00 sei entrevista eskluziva ho media Agencia TATOLI no Rádiu Televizaun Timor-Leste, Empreza Públika (RTTL, EP), hafoin entevista, nia sei vizita ba Embaxada Filipina iha Timor-Leste.
Durante Pacquiao estadia iha Timor-Leste, sei hala’o uluk vizita ba Prezidente Repúblika José Ramos Horta, Primeiru-Ministru Kay Rala Xanana Gusmão no Klube Boxe sira iha Dili laran hanesan, Benfica, El-Matadór no Dili Boxe.
João Rodriges, relata MJDAK prepara orsamentu hamutuk rihun $26 hodi uza ba vizita Boxista Lejendáriu Manny Pacquiao ne’ebé sei to’o Timor-Leste semana ne’e.
“Ita halo ona preparasaun osan hamutuk rihun $26 atu halo atendimentu ba Manny Pacquiao nia vizita ne’e, orsamentu ne’e mak ita halo ba han kalan hamutuk ho nia, halo komunikasaun no monta publisidade no seluk tan”, João ba jornalista-sira iha edifisiu MJDAK, segunda ne’e.
Nia esplika, MJDAK halo ona kooperasaun ho PNTL hodi fó seguransa másima ba Boxista Filipino ne’e.
“Nia Boxista internasionál lakohi ema atu rabat demais nia, entaun ita koopera ho parte seguransa PNTL atu fó seguransa másima ba nia durante nia vizita”, nia afirma.
Tuir orariu ne’ebé iha Many Pacquiao to’o Timor-Leste iha 28 setembru no fila hikas ba Filipina iha 30 setembru ho aviaun komersiál Citilink.
Vizita ne’e realiza tanba MJDAK servisu hamutuk ho Ministériu Negósiu Estranjeiru no Kooperasaun (MNEK) no Ministériu Saúde (MS).
Notísia relevante : Manny Pacquiao vizita TL iha 28 setembru 2023
Délio uza Manny Pacquiao sai referénsia iha SEA Games
Jornalista: Hortencio Sanchez
Editór : Zezito Silva
