COVALIMA, 08 outubru 2023 (TATOLI)-Komandante PNTL Munisípiu Covalima , Superintendente Polísia Calisto Gonzaga , hateten, membru polísia presiza tuir formasaun iha área lejizlasaun sira-ne’ebé vigora iha instituisaun, tanba ajente balun seidauk iha koñesementu.
“Ha’u identifika ona buat balun atu reforsa kapasidade aumenta koñesementu ba ita-nia pesoál sira nune’e hatene lejizlasaun saida mak vigora iha instituisaun,” Superintendente Polísia Calisto Gonzaga, hato’o iha komandu PNTL, Covalima.
Nia dehan, membru polísia presiza iha koñesementu kona-bá estatutu instituisaun, lei orgánika , regulamentu disiplinár no rejime remuneratóriu.
Formasaun iha área lejizlasaun iha instituisaun sira-ne’e, importante ba membru PNTL sira importante atu hasa’e sira-nia koñesementu hodi halo reflesaun.
Iha loron (28/09) tinan ne’e, Organizasaun The Asia Fundation, servisu hamutuk ho Polísia Nasionál Timor-Leste (PNTL) fasilita formasaun refresing trening ba Ofisiál Polísia Suku (OPS) hosi Suku 30 iha munisípiu Covalima.
Formasaun refreasing treaning ba OPS , tanba sira hala’o servisu kleur ona iha suku, liuhusi formasaun ida-ne’e atu hasa’e sira-nia koñesementu presza fó hanoin nafatin nune’e atu servisu ho responsabilidade.
Komandu Munisípiu Covalima iha nia eskuadra hitu mak hanesan Fatululik, Fatumea, Tilomar, Fohorem, Maucatar, Suai no Zumalai ho nia suku 30 no aldeia 148.
Komandu PNTL Munisípiu Covalima hamutuk 148 ne’ebé balun koloka ba eskuadra hitu iha munisípiu Covalima.
Jornalista: Celestina Teles
Editór: Evaristo Soares Martins
