OÉ-CUSSE, 19 outubru 2023 (TATOLI – Asisténsia Legál ba Feto no Labarik (ALFeLa), kuarta ne’e, atualiza progresu serbisu ALFeLa nian ba Prezidenti Autoridade RAEOA (Rejiaun Autónoma Espesiál Oé-cusse, Ambeno), Arsénio Paixão Bano, iha Káfe Dominikana Oé-Cusse.
“Ohin, ami mai hasoru Prezidente Autoridade RAEOA ninia objetivu maka ALFeLa hato’o nia relatóriu, narativu no relatóriu finansa ne’ebé maka ALFeLa hetan ona fundu hosi Governu liuhosi Autoridade RAEOA,” Diretora ALFeLa, Marselina Amaral, ba jornalista sira hafoin ramata enkontru.
Notísia relevante: Autoridade RAEOA selebra kontratu ho asosiasaun ualu tau matan ba problema sosiál
Durante iha sorumutu ne’e, ALFeLa relata mós kona-bá preparasaun kampaña loron 16 nian violénsia hasoru feto ho labarik, ne’ebé maka kada tinan sempre hahú iha loron 25 novembru to’o loron 10 dezembru sempre halo komemorasaun ba iha kampaña, tanba planu ALFeLa sei realiza atividade ne’e iha RAEOA.
“Ohin mós ami husu apoia, ALFeLa nia planu orsamentu no ba iha implementasaun asisténsia ba iha vítima violénsia bazea ba jéneru iha RAEOA inklui territóriu nasionál, ne’ebé maka ALFeLa presiza hetan apoia hosi Governu inklui RAEOA atu-bele fornese asisténsia ba iha vítima sira, tanba dadús vítima violénsia bazea jéneru ne’ebé iha, ninia kuantidade ne’e aas tebes,” nia subliña.
Notísia relevante: RAEOA sei investe iha protesaun sosiál ba feto rurál
Prezidente Autoridade RAEOA, Arsénio Paixão Bano, agradese tanba hafoin rona relatóriu hosi ALFeLa, hatudu progresu di’ak liu-liu ba asisténsia ba vítima violénsia bazeia jéneru nian.
“Ohin enkontru atu rona sira-nia progresu serbisu durante ne’e la’o oinsa, dadús sira liga ho asisténsia legál ba vítima sira ba tinan ne’e, ema hira mak hetan ona informasaun liuhosi sosializasaun ba lei sira, liu-liu iha suku no estudante sira, ne’ebé sira-nia atividade hatudu progresu di’ak, ita mós agradese tanba apoia tebes RAEOA ba asuntu violénsia nian” Arsénio Paixão Bano, ba jornalista sira hafoin remata enkontru iha salaun Dominikana Oé-Cusse.
Tanba antes ne’e RAEOA selebra akordu ho sira, simplesmente tanba iha RAEOA hakarak hamenús númeru kazu violénsia doméstika, “Entaun ita fó asisténsia ba sira”.
Notísia relevante: ALFeLa rejista kazu foun 223 iha janeiru-maiu
Atu relembra fali katak iha loron 15 fulan maiu 2023 ne’e, Autoridade RAEOA selebra kontratu ho asosiasaun ualu liuhosi programa subvensaun públika ho valór $240,322 hodi apoia servisu autoridade kona-bá papél sosiedade sivíl nian atu tau-matan ba problema sosiál sira, ne’ebé akontese iha Oé-Cusse Ambeno.
Jornalista: Abílio Elo Nini
Editór: Rafael Ximenes de A. Belo
