OÉ-CUSSE, 08 marsu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, sei investe iha protesaun sosiál ba feto rurál nune’e kontribui ba prosesu dezenvolvimentu rejiaun nian.
Prezidente Autoridade RAEOA, Arsénio Paixão Bano, tersa ne’e hamutuk ho grupu feto sira, Organizasaun Naun Governamentál (ONG) no instituisaun relevante selebra loron mundiál feto, ho tema igualdade jenéru no mudansa klimátika hodi promove igualdade jéneru no inkluzaun sosiál iha rejiaun ne’e.
Prezidente Autoridade RAEOA, Arsénio Paixão Bano, hatete, iha tinan 2022 sei investe iha protesaun sosiál hodi harii uma hakmatek no kontinua apoia inisiativa feto rurál-sira liuhosi programa empoderamentu ekonomia hodi kontribui partisipa iha dezenvolvimentu rejiaun nian.
“Autoridade sei investe ba protesaun sosiál atu harii uma hakmatek ho investimentu kuaze rihun $300. Ida-ne’e atu fó protesaun ba feto maluk sira-ne’ebé sai vítima iha Oé-Cusse, ho nível promosaun hosi saúde, no kontinua apoia empoderamentu ekonomia ba feto rurál sira,” Arsénio Bano informa ba jornalista sira iha salaun Dominikana, Oé-Cusse.
Iha 2021 autoridade apoia fundu rihun $94 ba grupu feto 34 liuhosi Asosiasaun Feto Mudansa Ekonomia Família (AFMEF), atu dezenvolve inisiativa feto ba empoderamentu ekonomia iha área rurál, no envolve mós iha vida negósiu ho nivél oinoin.
“Ida-ne’e hanesan motivasaun ba inan feto-sira, nune’e bele iha vontade kria rasik serbisu hodi envolve iha vida ekonomia liuhosi atividade soru-tais hodi kontribui ba dezenvolvimentu rejiaun nian,” nia katak.
Maske nune’e, autoridade mós serbisu hamutuk ho UNDP hodi hasa’e kapasidade no abilidade ba grupu benefisiáriu feto sira iha programa Oé-Cusse Bussines Incubator hodi fasilita formasaun jestaun ekonomia no lideransa.
Koordenadór Asosiasaun Feto Mudansa Ekonomia Família (AFMEF), Joana Bobo Tanu, informa, progresu serbisu hosi inisiativa grupu feto 34 hatudu progresu di’ak tanba hetan akompañamentu hosi ekipa promosaun igualdade no inkluzaun sosiál inklui ekipa hosi AFMEF.
“Ha’u garante tanba tinan kotuk grupu feto 34 mai hosi suku 11, hetan ona apoia fundu hosi autoridade, ami hanesan monitorizasaun responsável katak atividade ne’e iha progresu di’ak hanesan soru-tais no negósiu ki’ik ne’ebé hala’o iha sub-rejiaun haat,” nia subliña.
Iha loron 28 fulan-dezembru 2021 Autoridade RAEOA hamutuk ho Asosiasaun Feto Mudansa Ekonomia Família selebra termu entrega apoia fundu ho valór rihun $94 ba grupu feto 34 atu dezenvolve insiativa feto sira-nia kreatividade ho durasaun tinan ida.
Fonte finansiamentu ba programa empoderamentu ekonomia família ne’e aloka liuhosi kategoria transferénsia públika RAEOA nian.
Notísia relevante: RAEOA-AFMEF selebra kontratu dezenvolve grupu feto 34
Jornalista : Abílio Elo Nini
Editór : Evaristo Soares Martins
