VIQUEQUE, 26 outubru 2023 (TATOLI)—Xefe suku Uma-Uain Leten, postu administrativu Viqueque Vila, munisípiu Viqueque, Martinho Soares Gusmão, husu joven sira atu kria pás no estabilidade durante prosesu eleisaun komunitária.
“Ita atu tama eleisaun komunitária, maibé akontese nafatin konfrontu iha fatin-fatin inklui iha ita-nia munisípiu Viqueque ne’ebé akontese iha postu Uatulari. Tanba ne’e, ha’u husu ba joven sira atu kria pás no estabilidade iha ita-nia suku, eleisaun bele la’o ho hakmatek,” Xefe suku hateten ba Agência Tatoli, iha suku Uma-Uain Leten, kinta ne’e.
Notísia relevante : PNTL destaka membru 202 asegura eleisaun komunitária iha Viqueque
Nia konsidera, eleisaun komunitária hanesan eleisaun familiár, nune’e joven no abitante sira tenke kontribui ba prosesu hodi buat hotu bele la’o ho di’ak.
“Ita tenke asegura festa familiár ida-ne’e iha ita-nia suku atu ita bele kontinua haburas demokrasia iha baze,” nia akresenta.
Líder komunitáriu ne’e fiar katak joven sira iha suku sei hakmatek durante prosesu.
“Ha’u sei kolabora ho parte hotu-hotu atu labele hamonu suku nia dignidade iha kualker situasaun. Ha’u nafatin motiva joven sira hodi lori suku ida-ne’e ba pás no trankilidade nia laran,” nia tenik.
Tuir dadus, eleitór iha suku Uma-Uain Leten kompostu hosi aldeia hitu hanesan Bahauai iha eleitór 263, Baria 199, Cailoibere 262, Lialura 115, Macalaco 329, Retika 166 no Tutucui 199.
Jornalista : Vitorino Lopes da Costa
Editora : Julia Chatarina
