OÉ-CUSSE 07 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, fó-sai, ezekusaun Orsamentu Jerál Estadu (OJE) 2023 RAEOA nian to’o loron 06 novembru 2023 ne’e atinje ona 61% ho gastu millaun $51, komposta hosi Fundu Espesiál Dezenvolvimentu (FED) millaun $22 (73%) no RAEOA nian millaun $28 (54%).
Notísia relevante: PA RAEOA klarifika razaun ezekusaun OJE 2023 iha Oé-Cusse ki’ik
Prezidente Autoridade RAEOA, Arsénio Paixão Bano, hateten, iha tetu orsamentu Jerál Estadu (OJE) hosi RAEOA no ZEESM-TL nian, hamutuk millaun $120, ne’ebé desagrega ba RAEOA millaun $84 no FED millaun $36.
Maibé iha jullu 2023, wainhira IX Governu Konstitusionál exerse nia funsaun, iha ajustamentu ba OJE 2023 ho orsamento retififikativu.
Nune’e kauza mós ba mudansa iha orsamentu originál ne’ebé aloka ba RAEOA no ZEEMS-TL iha 2023 ne’e millaun $120, ba millaun $83 hosi montante ne’e RAEOA hela ho millaun $53 no FED hela ho millaun $30.
“Exekusaun to’o loron 06 novembru 2023 ne’e atinje 61%, ekivale ho gastu millaun $51, ida-ne’e lá inklui obrigasaun no komitmentu, ida-ne’e ita nota katak, taxa ezekusaun ba RAEOA ZEEMS-TL nian tuir duni tarjetu ne’ebe maka atu atinje iha terseiru trimestre,” Arsénio Paixão Bano informa, bainhira hala’o enkontru ofisiál ho setór privadu sira iha otél Ambeno Oé-Cusse, segunda ne’e.
Notisia relevante:PN preokupa ezekusaun OJE 2023 iha Oé-Cusse foin atinje 43%
Ezekutivu ne’e, esplika, kona-bá ezekusaun osan ba RAEOA nian atinje 54%, ekivale ho gastu millaun $28, ida-ne’e lá inklui obrigasaun ho komitmentu. Gastu ida-ne’e mai hosi programa 12, nune’e taxa ezekusaun sei aumenta wainhira pagamentu iha obrigasaun realiza ona.
“Ezekusaun ba FED nian atinje 73% ekivale ho gastu millaun $22, ida-ne mós lá inklui obrigasaun ho komimentu, no gastus ida-ne’e mai hosi programa sia (9),” nia afirma.
Ezekutivu ne’e, promete katak, haree ba ezekusaun daudaun, Autoridade ho senáriu ida katak to’o dezembru 2023 ezekusaun RAEOA bele atinje to’o atinje 85% ba FED bele to’o 95%, tanba haree ba reseita estimada to’o tinan ramata RAEOA no ZEESM-TL sei tranzita ba tinan 2024 ho saldu jerénsia millaun $88-resin ($88,181,959.00).
Notísia relevante: Orsamentu Retifikativu ba RAEOA, Governu Sentrál ko’a millaun $36
Jornalista: Abílio Elo Nini
Editór: Evaristo Soares Martins
