OÉ-CUSSE 17 agostu 2023 (TATOLI – Governu Sentrál ko’a Rejiaun Administrativa Espesiál Oé-Cusse Ambeno (RAEOA) nia Orsamentu Retifikativu hamutuk millaun $36 hosi totál millaun $120 tanba projetu balun autoridade la konsege ezekuta.
Notísia relevante: OJE 2023: RAEOA define programa 16 korresponde ho millaun $120
Prezidente Autoridade RAEOA, Arsénio Paixão Bano, esplika, RAEOA iha orsamentu rua, primeiru orsamentu ba RAEOA rasik iha 2023 hamutuk millaun $120, inklui orsamentu ba Fundu Espesiál Dezenvolvimentu (FED) millaun $36.
“Ezekusaun ba FED to’o agora atinje ona 47% no orsamentu ba RAEOA nian foin to’o 19% ki’’ikliu, ne’e mak ami husu koordenasaun no simu orientasaun hosi Governu Sentrál, ko’a tiha millaun $36, agora hela millaun $84,” Arsénio Paixão Bano ba jornalista sira iha Oé-Cusse, kuarta ne’e.
Ezekutivu ne’e esplika, koordenasaun ba Governu Sentrál tanba antes to’o fulan-dezembru 2023, Governu Sentrál husu atu hamenus millaun $36, tanba projetu balu la konsege halo aprovizionamentu to’o dezembru 2023.
“Agora ami só asegura de’it projetu balu ne’ebé halo ona hanesan, eskola 19, postu saúde balun, estrada sira-ne’ebé la’o daudaun, projetu uma 120 ba komunidade afetadu sira, selu kompensasaun ba rai afetadu sira, operasionalizasaun aeroportu, kombustível ba sentrál elétrika, saláriu ba funsionáriu sira tenke iha nafatin, administrasaun ba ambiénte atu moos nafatin, ne’e mak ami asegura to’o dezembru 2023,” nia katak.
Entretantu, atu rekorda katak Parlamentu Nasionál ne’ebé aprova hosi montante $120,000,000.00 ne’e dezagregasaun kategória lima, maka hanesan;
Sálariu
Iha 2022 hamutuk $11,086,859.00 ba Grande Opsaun Planu 2023 ho montante $12,577,374.96 ba tetu OJE 2023 hamutuk $12,559,985.00.
Bens no servisu
Iha 2022 hamutuk $21,361,440.00, ba Grande Opsaun Planu 2023 ho montante $23,542,618.21 ba tetu OJE 2023 hamutuk $26,078,050.39.
Transferénsia públika
Iha 2022 hamutuk $4,410,587.00 ba Grande Opsaun Planu 2023 ho valór $6,272,699.33 ba tetu OJE 2023 hamutuk $5,744,5888.52.
Kapitál menór
Iha 2022 hamutuk $647,155.00 ba Grande Opsaun Planu 2023 ho montante $5,776,932.00 ba tetu OJE 2023 hamutuk $3,556,752.00.
Kapitál Dezenvolvimentu
Iha 2022 hamutuk $52,059,303.00 ba Grande Opsaun Planu $82,163,918.80 ba tetu OJE 2023 hamutuk $72,061,624.09.
Nune’e totál totál OJE 2023 hamutuk millaun $89,565,344.00 iha Grande Opsaun Planu OJE 2023 hamutuk $130,333,543.30, no iha tetu OJE 2023 hamutuk $120,000,000,00.
Notísia relevante: OJE 2023, RAEOA ezekuta ona 30,83%
Jornalista : Abílio Elo Nini
Editór : Evaristo Soares Martins
