BOBONARO, 09 novembru 2023 (TATOLI) – Eletrisidade Timor-Leste, Empreza Públika (EDTL,E.P) Munisípiu Bobonaro, fornese ona enerjia elétrika ba uma-kain 1,676 iha fulan-outubru tinan ne’e.
Koordenadór EDTL,E.P Munisípiu Bobonaro, Mário de Jesus, esplika, uma-kain hira-ne’ebé mak asesu ona ahí mai hosi suku Raiheu ho totál 500, Atudara 380, aldeia Pipgalak 108, Saburai hamutuk 480 no aldeia Atus 208.
Notísia relevante: EDTL halakan ahi ba suku Raiheu no Atudara
“Agora daudaun ne’e hamutuk 1,676 mak ahi lakan tiha ona iha fulan kotuk liuhosi Projetu Eletrifikasaun Nasionál (PEN) 2022,” nia informa ba Tatoli, iha Maliana, kinta ne’e.
Daudaun ne’e ekipa tékniku mós halo hela instalasaun poste iha aldeia Faluai, suku Leo-hitu, postu administrativu Balibo, ne’ebé ho nia progresu fíziku atinje ona 50%.
Hosi númeru uma-kain ne’ebé EDTL Foin fornese enerjia elétrika, Koordenadór Mário de Jesús dehan, totál suku 49 iha munisípiu Bobonaro mak asesu ona enerjia elétrika, falta suku Goulolo, postu administrativu Cailaco inklui aldeia 11 de’it mak seidauk asesu.
“Iha suku Goulolo nia moos, iha loron hirak liubá, ami lori ona poste média tensaun metru12 ba iha-ne’ebá, maibé iha maluk balu mak halo impedimentu Projetu Eletrifikasaun Komunitária (PEK), maibé ami koko sei hasoru fila-fali ho autoridade lokál suku nian no postu, atubele ko’alia oinsá mak bele lori ahi ba iha-ne’ebá,” nia katak.
Notísia relevante: Xefe suku Lour ezije EDTL instala elétrika ba aldeia rua
Jornalista : Sérgio da Cruz
Editór : Evaristo Soares Martins
