DILI, 07 dezembru 2023 (TATOLI) – Organizasaun Estrela+ hamutuk ho parseiru sira halo lansamentu ba dokumentáriu video relasiona ho diskriminasaun estigma ba ema ho moras HIV/SIDA iha Timor-Leste.
“Ohin ami hamutuk ho UNFPA, Ministériu Saúde ho PDHJ hodi lansa dokumentáriu video liu husi esperiénsia ema ne’ebé mak hetan moras HIV/SIDA, entaun objetivu husi lansamentu ida-ne’e realidade sira ne’ebé mak timoroan sira hasoru virus ida-ne’e kuaze ema halo estigma no halo diskriminasuan ba sira”, Diretora Ezekutiva Estrela mais Ines Lopes hateten ba jornalista sira, ohin.
“Tanba ne’e ita koko fó sai video ida-ne’e atu husu intervensaun sira husi Governu, sosiedade sivil, relijiozu sira, atu halo intervensaun hodi bele redús no hadia sistema sira atu labele hamosu diskriminasaun iha soseidade”, nia esplika.
Iha fatin hanesan, Sekretáriu Ezekutivu, Provedoria Direitus Umanu no Justisa, Ambroso Graciano soares, dehan PDHJ nia papel ba asuntu direitu umanu mak banhira atu fó sai ema nia privasidade konsidera tama ona ba krime tanba viola ema nia direitu.
“Ita liga ba kazu HIV/SIDA, dala barak mosu estigma no diskriminasaun ba ita-nia sidadaun sira ne’ebé mak partilla ba públiku husi ita-nia pesoál saúde sira ba sidadaun sira ne’ebé mak afetadu ba moras ida ne’e bele hamosu ema nia direitu, entaun ida-ne’e krime”, Ambroso Graciano konklui.
Jornalista : Felicidade Ximenes
Editór : Zezito Silva
