DILI, 14 dezembru 2023 (TATOLI) – Estudante finalista nonu anu husi Eskola Bázika Sentrál (EBC) Farol hamutuk 137 mak la pasa iha ezame nasionál tinan letivu ida ne’e. Tanba ne’e, inan no aman sira halo asaun protesta hasoru dirijente eskola no husu esplikasaun ba Ministra Edukasaun, Dulce de Jesus.
Diretora EBC Farol, Filomena Belo Freitas, relata katak, ohin, situasaun iha sira-nian eskola la’o barullu uitoan tanba mosu dezentendimentu entre inan-aman sira no parte eskola relasiona ho alunu 137 maka reprovadu. Dirijente eskola hatán ona ba ezijénsia inan no aman sira-nian no haruka ona karta ba Ministériu Edukasaun atu husu esplikasaun husi ministra.
“Ami mós sente triste tanba tinan ida ne’e kuaze ami-nian estudante maka la pasa barak kompara ho eskola sira iha Dili. Tanba ne’e, ami haruka ona karta ba Ministériu Edukasaun hodi bele responde hela ami-nian preokupasaun ne’e atu ami bele informa fali ba inan no aman sira relasiona ho asuntu refere”, Filomena Freitas hatete ba Tatoli iha Farol, ohin.
Responsavel eskola ne’e afirma katak estudante nonu anu iha tinan ida ne’e hamutuk 400-resin, maibé 20% maka la pasa.
Nia salienta katak tuir loloos, ministériu tenke define ona estudante finalista sira atu pasa iha ezame nasionál ne’e tenke prienxe valór hira komesa husi nivel eskola bázika terseiru sikulu, sekundáriu jerál hira no tekniku voksaionál, nune’e bele iha padraun ida klara.
“Maibe, ita-nian ministériu la tau definisasaun valór de repende trava estudante barak hanesan ne’e, oinsá ita atu rezolve? Ita kontinua kria nafatin problema ba eskola sira”, nia kestiona.
Diretór Servisu Edukasaun munisípiu Dili, Carlito da Silva, husu ona ba inan no aman sira atu mantein kalma no husik asuntu ne’e ba parte kompetente sira maka rezolve.
“Ha’u husu ona ba inan no aman sira ne’ebé sira-nian oan la pasa iha ezame nasionál ne’e atu kalma hodi hein desizaun husi parte nasionál nian. Depois maka ita bele estuda fali atu haree kestaun ne’e”, realsa.
Rekorde katak rezultadu ezame nasionál hatudu katak iha de’it alunu 4,3% husi totál estudante 55.370 husi ensinu báziku, ensinu sekundáriu jerál, tékniku vokasionál no ensinu rekorrente iha anu letivu ida ne’e mak reprovadu.
Ba ensinu báziku, entre alunu 28.696 mak inskritu iha ezame no 344 auzente, 5,08% mak la pasa.
Totál estudante ne’ebé inskritu iha ezame nasionál tinan ne’e hamutuk 56.218, maibé 55.370 mak realiza ezame refere no husi númeru ne’e 52.603 mak aprovadu.
Jornalista: Tomé Amado
Editora: Maria Auxiliadora
