DILI, 15 dezembru 2023 (TATOLI) – Ministra Edukasaun, Dulce de Jesus, hatete rezultadu ezame nasionál ne’ebé publika foin lalais ne’e sei la halo tan mudansa, nune’e nia enkoraja alunu sira ne’ebé reprovadu iha ezame atu prepara aan iha futuru.
Deklarasaun ida ne’e governante halo relasiona ho protestu inan no aman sira ba dirijente Eskola Bázika Sentrál (EBC) Farol no husu klarifikasaun ministra nian tanba sira-nian oan hamutuk 137 mak la pasa iha ezame refere.
“Rezultadu ne’ebé fó sai ona mak hanesan ne’e duni, laiha tan mudansa, ne’ebé sé maka la pasa iha tinan ida ne’e tenke prepara aan di’ak liután ba futuru ne’ebé di’ak liu. Ha’u husu ba estudante sira labele laran-taridu maibé tenke fuan boot hodi prepara aan”, Dulce de Jesus realsa ba Tatoli iha Parlamentu Nasionál, ohin.
Nia salienta estudante sira ne’ebé seidauk hetan oportunidade ne’e tanba sira-nian prearasaun maka seidauk másima, tanba ne’e Ministériu Edukasaun (ME) sei iha responsabilidade boot hamutuk ho inan no aman sira atu kontinua fó apoia ba oan sira.
“Nu’udar Ministra Edukasaun ha’u sei kontinua fó apoiu ba jornada akadémika oan sira-nian atu iha futuru sira bele hetan susesu liután, tanba papél Ministériu Edukasaun nia maka atu kontinua haree prosesu aprendizajen ba labarik sira iha futuru nomós tulun profesór sira bele hatene didi’ak sira-nian papél no obrigasaun”, afirma.
Responde ba parte eskola nia preokupasaun kona-ba ME tenke define padraun valór ba estudante sira, governante ne’e esplika katak iha dekretu-lei hakerek ona bainhira eskola sira atu realiza ezame nasionál ba estudante sira, valór ho nia pursentajen ne’e define tiha ona nune’e maka bele deside estudante ida aprovadu ka reprovadu.
“Padraun valór sira ne’e husi nivel eskola bázika no sekundária jerál maka ninia valór foti husi primeiru no segundu trimestre nian 50% mak soma ho valór ezame nasionál 50% depois maka bele deside estudante ne’e aprovadu ka reprovadu. Enkuantu valór ba eskola tékniku vokasionál maka diferente, sigifika foti husi ezame primeiru no segundu trimestre 70% depois soma hamutuk ho valór ezame nasionál 30%, nune’e bele deside aprovadu ka reprovadu”, esplika.
Rekorde katak rezultadu ezame nasionál hatudu katak iha de’it alunu 4,3% husi totál estudante 55.370 husi ensinu báziku, ensinu sekundáriu jerál, tékniku vokasionál no ensinu rekorrente iha anu letivu ida ne’e mak reprovadu.
Ba ensinu báziku, entre alunu 28.696 mak inskritu iha ezame no 344 auzente, 5,08% mak la pasa.
Notísia relevante: Alunu 137 reprovadu, inan-aman protesta dirijente EBC Farol no husu klarifikasaun ME
Jornalista: Tomé Amado
Editora: Maria Auxiliadora
