DILI, 18 dezembru 2023 (TATOLI)—Loja Hakbi’it Agrikultura liuhosi atividade negósiu sosiál konsege rekolla millaun $2,3 durante tinan-haat, hahú tinan 2019 to’o 2023.
“Estabelesimentu Loja Hakbi’it Agrikultura nia objetivu mak atu ajuda no fasilita merkadu ba agrikultór lokál sira, nune’e produtu ne’ebé sira kuda bele iha valór no kontinua promove rendimentu sustentável ba agrikultór lokál sira,” Jestór Loja Hakbi’it Agrikultura, Teo Baldo da Costa Soares, informa ba Agência Tatoli, iha Fatuhada, segunda ne’e.
Notísia relevante : SEKoop estabelese ona loja kooperativa 10 resin iha munisípiu sira
Grupu agrikultór hamutuk 500 hosi munisípiu hotu inklui Rejiaun Administrativa Espesiál Oé-cusse Ambeno (RAEOA) fornese produtu lokál hodi fa’an iha Loja Hakbi’it Agrikultura.
Jestór loja dehan, kada fulan loja simu produtu iha loron 05 to’o 10 no halo transferénsia rendimentu 85% ba konta bankária grupu agrikultór sira-nian, ne’ebé hosi rendimentu ne’e direitamente ba konta bankária agrikultór lokál ho persentajen 15% atu simu produtu hodi hatán ba merkadu.
Produ lokál sira ne’ebé daudaun fa’an iha loja mak hanesan tomate, foos rai, fore-mungu, batar, kafé, inklui ai-fuan hanesan aidila, has, hudi no seluk tan.
“Ami mós fa’an produtu lokál sira ne’ebé transforma ho inovativu no kreativu hanesan ne’ebé nakonu ho nutrisaun no di’ak ba saúde hanesan paun, jus no seluk tan,” nia tenik.
Loja Hakbi’it Agrikultura rasik iha Dili estabelese iha fatin rua hanesan Fatuhada no Timor Plaza, ne’ebé hetan suporta hosi Governu liuhosi Ministériu Agrikultura Pekuária Peska no Floresta (MAPPF) no Ajénsia Kooperasaun Internasionál Japaun (JICA).
Jornalista : Arminda Fonseca
Editora : Julia Chatarina
