DILI, 05 janeiru 2024 (TATOLI)—Sekretaria Estadu Formasaun Profisionál no Empregu (SEFOPE) daudaun ne’e seidauk bele halo rekrutamentu traballadór timor-oan bá serbisu iha Brunei Darusalam tanba presiza kria sistema baze dadus.
Diretór Nasionál Empregu Estranjeiru, João Correia Pereira, hateten, maski Governu anteriór halo ona nota entendimentu ho Governu Brunei Darusalam iha tinan kotuk, maibé to’o agora seidauk bele implementa tanba presiza prosedimentu balun.
“Agora ita seidauk bele halo rekrutamentu traballadór timor-oan ba Brunei tanba ita seidauk iha sistema ida atu kesi. Ho ida-ne’e dezembru 2023 ami foin halo enkontru ho Timorense Manpower Agency (TMA) hosi Brunei hodi diskute kona-ba kria sistema baze dadus rasik, hanesan ita halo ho Austrália no Koreia Súl,” Diretór informa ba Agência Tatoli, iha ninia knaar fatin, Becora, sesta ne’e.
Notísia relevante : Brunei: Ramos Horta vizita Parke Rekretivu Bukit Paktoi
Sistema baze dadus ne’ebé daudaun ekipa responsável diskute hela atu implementa ne’e importante hodi halo prosesu rekrutamentu no bele organiza dadus sira ho di’ak.
“Kada nasaun mai ho ida-idak ninia sistema ka regulamentu rasik, tantu Austrália no Koreia Súl, ho ida-ne’e ba Brunei nian, ita sei diskute no estabelese sistema tiha mak foin halo rekrutamentu,” nia akresenta.
Governu liuhosi reuniaun Konsellu Ministru iha loron 19 setembru 2023, aprova ona hodi asina akordu entre Governu Timor-Leste no Brunei Darusalam ba programa mobiliza traballadór.
Nune’e, Prezidente Repúblika, José Ramos-Horta ho nia delegasaun vizita ba Parke Rekreativu Bukit Paktoi, hodi asina akordu ho empreza balun iha Brunei Darusalam, iha novembru 2023 hodi simu traballadór timor-oan bá serbisu.
Jornalista : Arminda Fonseca
Editora : Julia Chatarina
