DILI, 10 janeiru 2024 (TATOLI)—Sekretáriu Estadu Veteranu (SEV), Cesar da Silva “Merak”, hateten atu identifika vítima mortál funu hosi tinan 1975 to’o 1999 liuhosi uma-lisan ida-idak ne’e to’o agora iha uma-lisan hamutuk 100-resin mak MACLN seidauk rekolla dadus ema mate iha funu laran, nune’e tempu badak sei atribui tan formuláriu.
Notísia Relevante: Vítima mortál dezde 1975-1999 iha Ossouala na’in-811
“Ita sei iha uma-lisan 100-resin mak seidauk rejista. RAEOA tomak hela no iha munisípiu balun mós seidauk. RAEOA ne’e parese ema barak tanba nia odamatan Timor-Leste ne’ebé mak ema tama mai. Agora ami planu atu identifika uluk uma-lisan hira mak iha ne’ebá,” Sekretáriu Estadu Veteranu (SEV), Cesar da Silva “Merak”, hateten ba Agência Tatoli iha nia kna’ar fatin, Caicoli, tersa ne’e.
Nia hatutan, molok atirbui formatu ba uma-lisan hirak ne’e, ekipa verifiksaun sei hatama lista ba sistema.
“Agora ami insert hela ba baze dadus no ami identifika ona ema mate liuhosi formaláriu ne’ebé ita atribui hamutuk 233.951. Nune’e, MAKLN hamutuk ho SEV kontinua atribui formuláriu ba uma-lisan, nune’e bele hatene ema hira mak mate duranta funu ne’e,” nia dehan.
Hosi númeru ne’e, SEV dehan, sei halo verifikasaun ba dadus hodi identifika ema mate tan saida, mate tan moras ka milísia mak oho ka keta nia servisu ho milísia mak membru FALINTIL sira oho.
“Ida-ne’e, ita presiza halo maibé sei hein rezultadu rekolla dadus hosi uma lisan 100-resin ne’e,” nia hateten.
Entretantu, Prezidente Konsellu Veteranu Munisípiu Lautém, Aurélio Freitas Ribeiro “Africoro”, husu IX Governu atu haree no verifika dadus uma-lisan ne’ebé kada munisípiu nian, ne’ebé entrega ona ba ministériu tanba ida-ne’e importante atu hatene.
“Halo levantamentu ne’e atu hatene ita-nia emar hira mak mate funu laran, ida-ne’e ita presiza hatene tanba informasaun la klaru. Tanba, balun dehan 300.000 no iha balun dehan fali 200.000-resin. Ne’e mak VIII Governu Konstitusionál halo polítika ba levantamentu hodi hetan verdade hira mak mate no mate ho motivu saida. Tanba ne’e, husu ba Governu ida-ne’e katak depois de verifikasaun dadus veteranu tinan 2009 nian finaliza ona, tenke kontinua ona halo verifikasaun ba dadus uma-lisan nian. Ida-ne’e presiza tebes tanba hakarak atu hatene Timor-Leste nia ema mate hira iha funu laran,” nia dehan.
Antes ne’e, Antigu Ministru ba Asuntu Kombatente no Libertasaun Nasionál, Júlio da Conceição ‘Meta-Malik’, fó-sai katak, dadus provizóriu vítima mortál funu hosi tinan 1975 to’o 1999 hamutuk na’in rihun 200-resin mak Governu identifika ona hosi uma lisan sira iha territóriu nasionál.
“Dadus provizóriu uma-lisan iha Timor laran tomak hamutuk rihun 16, provizóriu seidauk kompletu. Hosi uma lisan rihun 16 ne’e rihun 200-resin, seidauk kompletu tanba Oé-Cusse mós seidauk tama,” Meta Malik hateten.
Notísia Relevante: Governu kontinua rekolla dadus vítima mortál funu 1975-1999
Jornalista : Osória Marques
Editór : Cancio Ximenes
